港股冇人吼，政府黐中東幫手搵「錢途」｜凍鏈茶專欄

為咗改善港股無人玩呢個格局，政府8月底就公布成立「促進股票市場流動性專責小組」。香港上市公司商會主席梁嘉彰講明，美資、歐資已經唔係好嚟香港，問題非常嚴重，呼籲成立跨部門專責小組，開拓新領域，吸引中東資金來港。

其實中東資金確實對亞洲好有興趣，不過當香港背靠祖國嘅時候，人家新加坡早喺十幾年前已經開始部署中東機遇。前新加坡總理吳作棟2004年退任之後，就繼續代表新加坡同中東一路緊密聯繫。新加坡早已同沙特、阿聯酋等海灣合作委員會（GCC）6國，簽署首份自貿協議，淡馬錫曾經同與阿布扎比投資局（ADIA）一齊支持科企GoTo上市；同屬環球十大主權基金嘅卡塔爾投資局（QIA），亦有喺新加坡設分局，仲有唔少新加坡嘅企業都唔難見到中東油王嘅腳印。