70後想供女兒海外留學 揸現金20萬月儲2萬 月供股票要點揀 ｜龔成信箱
撰文：龔成 ｜圖片：新傳媒資料庫、unsplash
1.海外留學
龔成老師你好，本人43歲有1子1女無樓，小女突然想3年後考完DSE去美國讀書，她讀書還可以，我唔想同她講我沒有錢供唔到你去讀書，我不想令她失望，所以希望老師能幫幫我！
我現在有20萬現金，約20萬股票30萬外幣 除生活費外每月可儲蓄2萬元 請問唔計現在的20萬元 ，三年後我能儲蓄到100萬元嗎？（24萬x3年=72萬 只有3年時間可能短了一些）
如果現在月供股票3年有幫助嗎？月供股票可以隨時唔供嗎？銀行或證券行是否規定供股年份？如果現在開始供股你建議我買什麼股票？XX證券話一世免佣是否真的或會收其他費用？值得幫襯他嗎？
謝謝老師！
龔成老師：
如果你打算3年後要用這筆錢，這刻都可以投資，但就不能太進取，因為我地投資股票，要長期先見到效果，優質企業的價值會向上，但中短期的股價則會波動。
如果單單用你計，每月可儲蓄的$2萬，加上基本的增值，要滾到上去$80萬-$100萬，可以的，但都要視乎到時的市況，以及你持有股票的表現。
由於時間不算長，不能太進取，你每月能儲$20000，可以將其中$15000去做月供股票，餘下就儲現金。
同時，投資時要以穩健為主，其中$8000投資平穩增值股，例如盈富（2800）、港鐵（0066）、領展（0823）、另外$7000投資收息股，例如港燈（2638）、工行（1398）、置富（0778）、香港電訊（6823）等這類，建立一個平衡組合，你不斷月供就得。
月供股票，絕大部分銀行及證券行，都比你隨時停供的，佢地無規模供款的年期，當然，你登記時一定要問清楚。
香港的監管不錯的，銀行及證券行都信得過，可以去供。
但我最後想講一樣野。
你為小朋友準備將來是好事，但太多的準備，未必對佢地成長最好，有時要佢地自己解決問題，都是學習與成長的一部分，你都要佢明白，自己要為自己的人生努力，你部分費用可以幫佢比，但都要比佢知一個概念，自己都要為這件事努力。
我小學時期，已經會做小生意賺錢，就是因為家中給我的零用錢不多，我要再多時，不會問家人欏，而是自己想方法賺得到。所以，環境會令一個成長的。（對照龔成信箱：Q6681）
2.平穩增長股
老師，有什麼平穩增長股介紹
1038 and 2800 ?
另外現價的0003煤氣可以入貨?
龔成老師：
盈富（2800）及長建（1038）當然可以投資，長線持有無問題的，分注或月供就得，長建有前景，但中短期仍會較弱，你一定要以長線眼光投資這股先得。
至於煤氣（0003），優質，但長期處於略貴水平，但要佢跌落較平位好難。所以，最好是月供這股票。（對照龔成信箱：Q6634）
3.衍生工具
hi龔老師,我好苦惱，因為我係700於371元時買左call, 175於19元買左call..期限110日，請問有機會上番371和19蚊嗎？衣家止蝕太傷，請指教
龔成老師：
呢類衍生工具一向好難玩，我十幾年前都玩過，輸多贏少，所以唔玩。佢有相當高的潛在成本，就算正股無升跌，佢都會不斷消耗時間值，你只可以用時間鬥快。
所以，你用好見到有較大反彈時賣出，唔好死守，否則時間值一定令你更傷。（對照龔成信箱：Q6636）
4.建滔積層板（1888）
龔老師你好！你覺得1888 建滔積層板, 呢隻股票質素如何? 現價是否買入時機?多謝!
龔成老師：
建滔積層板（1888）不過不失的，佢雖然都有一定的規模及技術，但生意增長力不強，賺錢能力算是中等，業務略有波動。
前景可以的，但不是爆炸性增長的類型，現價不貴是吸引之處，這股都可投資的，現價可分注。（對照龔成信箱：Q6637）
5.潛力股
龔sir，有事請教：
1，想問問金碟國際（268）是否很有潛力?
2，另外想幫朋友問問，他買入熊貓綠能（686） 北控水務集團（371），想問這兩隻股應否長期持有? 長遠正面嗎？
感謝龔sir專業分析，閣下已買了《股票勝經》，正在努力閱讀，非常有用，謝謝
龔成老師：
1）金蝶國際（0268）有一定的質素，前景亦不錯，但現時的估值過高，已經處過熱水平，這刻買入要小心，市盈率去到60倍，並不能以平宜去形容。
2）熊貓綠能（0686）的發展唔錯，前景正面的，但同樣有估值過高的問題，如有貨，可以長線持有，但如果這刻先買入，就要小心。
北控水務（0371）是不錯的股票，只是市場對佢增長力預期不斷改變，所以股價變化較大，從基本的業務分析，這股正面的，前景不錯，但就不要預佢有高速的增長，長線平穩無增長問題的。
《股票勝經》可說是股票知識的基礎及大集合，相信你讀後，投資實力會大增的。（對照龔成信箱：Q6638）
6.月供股票
老師我想問月供股票有冇壞處？好處比壞處多？可唔可以拍個股票BB班詳細講解一下，如果遇到金融海嘯都唔洗驚？照供？除左冇錢供之外咩時候先需要停？
龔成老師：
月供股票的特點，好處、壞處，我都有拍過片放上fb，文章都有寫過，你試試找翻。我遲D都會再po的。
基本上，月供股票就係長期儲某股，所以，一定要選優質股，如果選錯股，就會令你的財富貶值，因此，一定要先學習選股的技巧，如無的話，就月供盈富（2800）。（對照龔成信箱：Q6640）
7.合理價位
想再問下, 利福(1212)既合理價位大概係幾多? 我果時係$15.5入既, 現時應唔應該繼續進行分注買入? 定係太貴…
另外, 現時既比亞迪維持係$50~55水平, 你之前講過話係合理水平/安全買入, 咁其實依家我得1手($58買入)係咪應該係依d價位加碼? 定係等到佢落$4x先? (唔知會唔會等到) 因為我覺得1手好似太少…
謝謝老師!
龔成老師：
利福（1212）現時算是在合理區的較上部，未算貴，但當然過了不平宜，因為這股比《50穩健收息股》推介時已上升了一倍。
你原有的貨，持有無問題，但這刻增持，只能分注。這股長期仍然正面的，不止崇光長遠有價值，佢啟德的發展項目，都是佢長期增長位。
至於1211，要睇下佔左你的投資組合幾多，這股有潛力，但都唔可以佔你投資組合太多，現價可買入，但如你本身資金少，買入後已佔了綑合大部分，那就不要。
但如果你現時的一手貨，佔你的組合很少，那當然可以增值。
其實，現時你月供都可以。這樣可以更有效分配資金，同時風險不高。（對照龔成信箱：Q6642）
8.手續費
老師，我每月供股$2000，最低收費每月$50算不算高。。。其實有無得預計將來回報可以有幾多？點先為之成本高？
龔成老師：
坦白講，有少少高，成本佔的%，最好在1%以下，2%已經是勉強的水平。
你可以提高月供金額，又或考慮其他銀行，我聽網友講，南X商業銀行算是較平，你可以問題。
至於回報率，我地無得知真正的回報，因為將來股價是不確定的，但我地可以從過往的回報率推算作參考。
例如盈富，跟蹤著恆指，而恆指過往幾十無的複息回報，就是15%，就算當佢之後增長減慢，預有10%都合理。（對照龔成信箱：Q6643）
9.止蝕
不好意思，想多問老師一個建議，就中芯國際這股票，當時唔識投資，訓身了五萬股（即五十多萬）
我應否止蝕然後拿筆錢去買樓投資好啊？暫時這股我蝕約8萬，希望老師給予些意見，謝謝
龔成老師，想請教如果我想下個月開始每月月供$20000股票，以下組合可以嗎？
823 領展 $3000
2388 中銀香港 $3000
270 粵海投資 $3000
1038 長建 $3000
175 吉汽 $2000
1211 比亞迪 $2000
1093 石藥 $2000
1299 友邦 $2000
龔成老師：
你不要太著重「賺蝕數」，這是一個心理影響，最重要是建立一個都是優質股的組合，我地會以企業的質素、長遠價值，去衡量是否持有這股，同時，任何股票，都不應訓身投資，因為我都要建立「平衡的組合」。
中芯國際（0981）質素算是中等，生意雖然都有增長，但盈利有點波動，股本回報率低，整體的賺錢能力算是中等。
這股可以投資，但就一定不是訓身，你可以賣出一半以上，餘下持有部分已足夠。但這筆錢是否要去買樓，則是另一個問題，因為這刻的樓市不平，投資價值不高，但仍有自住價值，所以，好睇你係咪有需要。
至於月供股要，當中都是有質素的，可以開始，上述股部分的中短期股價可能波動較大，但你唔洗理，長期月供就得。（對照龔成信箱：Q6644）
10.買樓
老師你好，我月薪26K的工，亦預計呢份工將會長做，所以人工方面未來都應該不會再有大躍進了。
我本身是一個幾慳家既人，好少花錢，除左每年一兩次的旅行花費幾千元，月薪入面扣除家用、必要開支及社交開支後都儲到大約是(月薪 – 6K)的錢。
現時月供左大約半年股票，從起初月供4000到現在月供11000
組合包括有2800、1211、823、1038、1928、1997及0003，每隻大約1500-2500不等，
目前值3萬7(但計埋息蝕緊1-2000)，
打算至少供5年，長放，暫時目標是供到一年收息12萬元為止。
對於一個剛進社會的新手有這樣的成績算不算合格，
我還有甚麼地方可以改善去儲+賺更多的錢呢？
(因為同男友想下年便買樓結婚，預計需要80萬左右的開支，佢同我的財務狀況差不多，月薪比我多數千。)
龔成老師：
現時你月供$11000，每月儲到現金$6000，分配的比例不錯，你可以保持這樣進行，月供股票是長期的投資，你完全不用理中短期的股價，以及當中的賺蝕情況，你不斷供就得。
當中的股票都是有質素的，長期進行最重要。
至於如何儲及賺更多的錢，你可以每天記賬，養成這習慣後，你可以節省更多支出，從而有至多初期資金作投資。另外，多提升投資知識，在選股、評估企業質素、價值、以及把握時機上，強化這些知識，自然能提升投資回報率。
另外，如果你地打算下年結婚，就要開始預留現金，因為投資要長線才能增值，中短期無人知當中的升跌情況，如果不幸遇著跌市，而你又需要現金，這就會令你出現虧損，所以，你地要開始增加翻現金部分。（對照龔成信箱：Q6645）
