毛記葵涌首掛點只100毛 早市高見11.76元 每手最多賺2萬幾｜100毛上市｜新股分析
撰文：浩德 ｜ 攝影：何柏基
毛記葵涌發言人「專家」Dickson代表致辭內容
毛記葵涌上市儀式由毛記發言人「專家」Dickson代表致辭及敲鑼，其後更接受傳媒訪問，內容如下：
「大家好，我係『毛記葵涌』嘅發言人，我叫專家Dickson。
喺2010年，望住賣$1張嘅《黑紙》，真係估唔到喺2013年會出現《100毛》依本雜誌；到望住賣$10本嘅《100毛》，我哋又估唔到，喺2015年，會出現『毛記電視』依個媒體；而望住$1都唔使畀就有片睇嘅『毛記電視』，當然亦唔會估到，喺2018年嘅今日，會出現『毛記葵涌』。
呢間就係一間咁樣嘅公司，一間甚至連創辦人自己都唔識分析、分析唔到嘅公司。所以，到咗今日當公司要學人上市喇，我哋最想多謝嘅，一定係以下呢兩個人：
第一個，係Patrick，佢喺2012年，當依間公司仲係賣緊$1張《黑紙》嘅時候，竟然唔理咩業績，唔理咩分析，憑住自己敏銳嘅眼光，錯手入咗股；
第二個，就係一班從來都咁盲目睇好我哋嘅讀者同觀眾，你哋係我哋心目中『最蠢，但係睇得最準』嘅財經專家。多謝你哋。最後，講開又講，『東方昇』加場，4月3號賣飛，自己留意返，多謝。」
「專家」Dickson與傳媒訪問內容：
對於預期股價走勢有沒有驚喜？
專家Dickson指：「100毛上到市都係一個驚喜，所以我估個走勢都應該驚喜嘅。」
對於公司前景是否有信心？
「嘩！雖然我係個『財經投資專家』，但其實我係一個『愛情財經投資專家』，我只能夠講，我自己希望，我自己愛情指數會上升嘅啫。」
覺得公司上市之後有沒有什麼不同？
「應該我估佢雪櫃入面發霉嘅食物會清理咗卦。如果你哋有睇我哋個愛護同事協會，應該都知我哋個雪櫃有好多同事發霉食物。」
公司會唔會多咗錢可以發展多啲唔同嘅嘢？
「我諗佢哋有冇錢都會不停喺每一日發展好多唔同嘅嘢架喇。」
對於免費電視牌照，公司方面會唔會都有興趣？
「嘩！好深喎呢個…呢個免費電視牌照?呢層我就唔係咁清楚，但我自己見解係…我就希望政府可以發出多啲免費電視牌照，因為大家可以多啲選擇，睇多啲唔同嘅嘢呀嘛。」
公司上市後會否爭取加人工？
「哦，呢個我就每一日都爭取，最好日日加畀我。」
公司上市後腦細會否對你有獎勵？
「我相信係會嘅，但我希望唔會係獎兩巴掌。」
會否想公司派予股份，
「呢層其實有架，佢哋派咗兩股畀我，就係東方昇嗰兩股。你哋有冇睇東方昇特異功能救香港，嚟緊會有門票畀我哋，大家有興奮都可以接收下，嚟緊加場呀4月3號賣飛。」
有冇想多謝邊個？
「主要都想多謝三位腦細，即係林日曦、林強同阿Bu。」
對於毛記點解咁多人抽？咁多人咁熱烈你有咩感受？
「好多人抽我哋隻新股咩？哦，點解會咁多人抽，可能係因為100毛個100好意頭。」
今日有冇咩慶祝活動？
「我諗就係返工。」
公司嚟緊有冇咩鴻圖大計？
「我估 ，佢哋每日都有鴻圖大計，但就要睇落去先知。」
公司嚟緊會唔會再搞多啲大型Show？
「我相信會、我相信會。」
你自己會唔會都搞Show？
「我自己本身就好少活動，都係等公司安排，我自己多數喺屋企無乜活動。」
對公司業績前景？
「公司有業績架咩，我自己估計，應該係ok。我諗呢啲你真係問返啲投資專家，我只係一個『愛情財經投資專家』，仲要係一個失敗嘅。」
會否與中資公司合作拍廣告？
「你係咪講中立嘅資金？（內地嘅資金）我諗應該唔會。」
會否與信用卡推出大型廣告？
「呢樣我真係唔知，我喺公司係斟吓水，行嚟行去，幫人整吓電腦。」
對於好多專家分析毛記嘅股份被炒高後好快跌返落嚟，會唔會擔心？
「哦，可能要問返腦細有冇擔心，因為我都好難去估到佢有冇擔心。」
作為員工，覺得老細今日心情點？
「佢就一貫作風，依舊都係黑面，冇咩特別。」
你哋公司會唔會有其他人，講到啲實際啲嘅嘢？
「我諗有嘅，我哋公司都OK嘅。」
點解揀你出嚟接受訪問？係咪有啲咩特別原因？
「我諗就冇，可能佢係驚黑面嚇親大家。」
毛記葵涌(01716)公開發售超購6,288倍，打破2014年上市的Magnum（02080，現稱奧克斯）的3,558倍，成為新一代「超購王」！毛記葵涌昨日暗盤價更勁升572.5% ！
是次毛記葵涌公開招股接獲14.3萬份申請，合共認購424.5億股，涉資509億元。公開發售觸發回撥機制，令該部分比例增至50%，一手2,000股中籤率只有0.8%，要購入1,000手（200萬、涉資240萬元）才穩獲一手。
