月入30000元月供股票 盈富港鐵領展比亞迪揀點好 ｜龔成信箱
撰文：龔成
想每月$8000-$10000月供股票，揀盈富？
問1：
龔sir你好，我睇了好多你回覆留言。
我決定做月供。
我今年30歲，月入三萬多，想每月$8000-$10000月供股票，我應該集中供2隻股票(各4000/$5000)，定還是4隻(各2000/2500)？
如供4隻，我應該會集中月供盈富，港鐵，領展，比亞迪,這個組合可以嗎？謝謝
龔成老師：
供4隻會比供2隻好，因為有較大的分散風險作用。而上述4隻股票，都可以月供，盈富（2800）可以佔比較多。
月供一定要長期進行，先至有價格平均的效果。原理是長期累積財富。
每月供$8000-$10000是否適合，要睇你有無錢剩，因為大市已升了不少，雖然仍可進行月供，但最好不要將「每月所有資金」都用月供，而是要有一點錢剩，令自己可儲到錢。因為這市況較適合一邊儲貨，一邊儲現金。當遇到跌市時，現金就有用。（對照龔成信箱Q4414）
依家入市 月供開始會比較好嗎
問2：
龔老師你好，睇完你既書獲益良多，心態上，知識上都被你既書改變左！
小弟今年28歲，戶口有大概100萬，另外打算月供15000股票，但係依家恒指係30000點以上既高位，如果依家黎入市，係咪月供開始會比較好？
我打算100萬裏面拎30萬出黎，月供3萬，另外出糧儲錢月供萬5，定係等個市回落返先黎開始月供好呢，希望老師可以比d意見，謝
龔成老師：
對，現時的市況不平，但卻未到狂熱期。所以，你無論如果都要有一些貨，否則資金會損失了機會成本。因為你不能「完全無貨的狀態」。
面對這個不平的市況，最好的方法就是長期月供，因為這可將風險減到最低，同時不怕錯失入貨的機會（月供基本上，幾時開始都得）。
所以你月供$30000+$15000，只要是有質素的股票，其實已經可以開始，到你供得咁上下，現金只有一半的情況下，要再睇到時的市況是否仍高，若果仍高，就要減少月供的金額。（對照龔成信箱Q4415）
達芙妮國際幾時買
問3：
老師，我見你推介潛力股0210佢市值8億幾 符合你書中所指?10億以下較好 想問佢係咪復蘇喇？
而家可否買入？
值搏率高唔高？唔該哂成哥！
龔成老師：
達芙妮國際（0210）其實有質素下跌的情況，但佢而家的確跌至平宜價位（我書中定義佢$10為合理），但佢面對的情況，我相信中短期仍未向好。
這股可以小小注，買入長線投資，等大環境好轉，因為佢不是無價值，但現時已平宜，在平衡風險下，可以小小注，都有值博率，但要有耐性，因為要較長時間才會回勇的。（對照龔成信箱Q4418）
由短炒轉長線投資
問4：
成兄你好，我之前一直短炒，但最近我開始聽你講，長線投資，揀一D有價值的股
不過，我仍然唔能夠掌握得好好，成日會諗，如果果隻股高位放左，低位入翻，咁應該有更大的回報，不是嗎？
龔成老師：
其實你仍未掌握長線投資概念，我投資，其實是長期買入企業，等企業慢慢增值，中短期的股價上落，其實可以唔理。
你可能見到d股價上上落落，回頭睇，會想「當時在高位放了，之後在低位入翻」就好，呢類係事後孔明，有好多野，以為好易，其實好難，捕捉股價其實好難。當你的投資經歷愈多，你就愈發現，買入後長期持有，反而最賺錢。（對照龔成信箱Q4424）
編按：龔成是於公屋長大的80後青年，畢業後於銀行從事投資相關工作，雖然月薪僅萬多元，但因為理財及投資有道，只花五年時間，於28歲已累積到100萬元資產，目前淨流動資產有數百萬元。著有暢銷書《80後百萬富翁》、《80後2百萬富翁》及《財務自由行》，並出任創富課程導師。
facebook專頁：facebook.com/80shing
個人網站：80shing.skx.io/
