26歲月儲$3,000 月供股票手續費貴 真係有so？｜龔成信箱
撰文：龔成 ｜圖片：visualhunt
1.月供股票
老師好，最近一直在看你的書，學到了很多東西。關於月供想請教一下老師的意見。
我現在26歲，人工不算高，因為自己出來租房開支比較大一個月大概只能儲蓄3000左右用於投資，另外1000左右暫時儲蓄等待時機。
雖然現在的月供計劃1000已經可以玩，但是手續費最少也要50，就算3000港紙全部月供手續費都1.6%上下。
雖然儲蓄積累原始資金和月供都各有利弊，但是老師會比較建議我月供3000還是把錢儲到足夠買入一手再投資呢？謝謝！
龔成老師：
月供始終是較好的。
你儲到一手先買，因為每隻股的入場費不同，有可能要儲多個月先入到，你有可能一次過在高位買入，但如果用月供，你買入價就可以長期平均。
雖然手續費較貴，但我都會建議你做月供，當然，月供太少，手續費佔比的確較多，以每月供$3000來說，1.6%手續費，勉強都可接受，這手續費比起你面對損失的風險，月供仍是有著數的。
當然，我希望你先儲下現金先，無論是備用，又或等機會，因此你可以儲幾個月現金先，之後先慢慢開始月供，咁樣會比較好。（對照龔成信箱：Q5605）
2.恆指ＥＴＦ（2833）
龔sir，想問下2800同2833有咩分別 除咗每手數量唔同，管理費同溢價唔同之外仲有咩分別
同埋2800個入場費比較高 我仲係一個大專生 每月parttime人工都吾係太多 如果每月月供2800個手續費會比較高 如果咁情況下分段買入2833定係每月供2800會好啲?
龔成老師：
盈富（2800）同恆指ＥＴＦ（2833），大家的目標都是追蹤著恆生指數，即是本質大致是一樣的，只是背後管理這基金的公司不同。
由於盈富的流通量及成交量較大，因此買賣差價會較少，而你買入2833，因為成交少，所以買賣差額會略高，但如果你長線投資，這問題不大。
另外，我睇翻2833佢過往的表現，佢出現誤差的情況，比2800高少少，但不嚴重。（即是追蹤恆指是的偏離程度）。
如果你資金不足，買2833都可以，只要長線投資就得，上述只是小問題。
另外，其實你可以月供盈富，亦可以解決你入場費不足的問題。（對照龔成信箱：Q5786）
3.美國債券
老師，我想問問買美國債券問題 因為我屋企有長輩已經年老 成世人儲存落大約7位數字現金 我曾經叫佢地放部分?現金落公用股 但係可能佢地以前睇到太多人玩股票搞到跳樓
所以我點解釋佢地都好抗拒 所以我諗緊好唔好幫佢地買美國債券 最近個債市慢慢步入熊市 債息慢慢上升令債價下跌 老師認為而家係咪時機開始步處買債券?例如兩年期
龔成老師：
債券的確是可投資的目標項目，但債券都好多，香港、美國、中國都有。
如果講美國債券，當美國加息時，債價就會下跌，因為要求的利息回報要上升，當然，除了這因素外，還有很多其他因素影響，但如果一直加息，債券價格很大機會會持續下跌。因此，一般來說，在加息週期買債券，未必是最好的策略。
你買短年期的債券可以的，但要持有至到期，因為中間賣出都可能因價格下跌而損失。（對照龔成信箱：Q5787）
4.平安（2318）
你好 我想問問你點睇中國平安 值得長線投資嗎？係呢個時候 我見到打economic war
我只有港燈2638 香港電信6823 係手（大約4萬）, 我有5萬左右想再買d野做投資 想問應該點投資好
龔成老師：
首先講財富分配，由於你本身持有的都是收息類型，因此，如果你想投資組合增值力高一點，可投資平安（2318）的。
這股有質素，有長線投資的價值，不過近期的股價不算平，買入可以，但這刻不要太大注，又或最好分注買入，不要一次過用盡$5萬。最好有少少現金剩。（對照龔成信箱：Q5788）
5.舜宇光學科技（2382）
早晨龔Sir, 我之前$112買入2382 及$5.35 買入0857。
請問你有什麼意見對於這兩隻股票及什麼價位可以再入注，謝謝你！
龔成老師：
舜宇光學科技（2382）正面，有長線投資價值，就算這股比你買入價升了不少，也不要賣出，要長期持有。至於是否買入，這刻有少少保留，因為現時的市盈率仍處於不低的水平，如果你有貨，不用急於買入，除非跌了10%才考慮。
至於中石油（0857），這股雖然都有質素，但質素不算太高，因為這只是商品企業，產品售價因國際油價而影響，所處位置比較被動，你的貨可長線持有，但未必值得在組合中，持有太多。（對照龔成信箱：Q5789）
6.保險股
成哥，我發覺保險依個行業你係問答上面有講過幾隻優質股，所以我就嘗試分析，但係我覺得依類行業既業務有點複雜，可能我功力未夠，但睇返你出書50隻優質股入面，都無提過保險依類股票，原因係乜？因為業務會波動？
龔成老師：
唔係呀，我本《50優質潛力股》，其中一隻保險股就是保誠（2378）。
其實，保險是一個不錯的行業，特別是人壽保險，毛利好高，加上有淨存金可用投資，因此企業價值更大，如果你有上過我堂，都知我喜歡壽險股的。
不過，保險企業由於會將淨存金作投資，因此盈利一定會因投資市場而略有波動，因此，在估值時要較小心。
當時我選《50優質潛力股》，最後選了保誠，其實，佢同平安（2318）等都是有質素的保險企業，但選佢的原因，除了因為佢有質素外，當時我寫的時候（2016年中），佢仍受英國脫勾事件影響，令股價跌了不少，這正是價值投資者投資的時候，當時股價只是$120，所以推了這股。（對照龔成信箱：Q5790）
7.中國海洋石油（0883）
您好，小弟最近開始拜讀您作品，開始認識股票，請問您中海油00883 應該咩價位入手呢？
或者依家佢入唔入得過？
龔成老師：
中國海洋石油（0883）雖然有一定的質素，但對新手來說，未必是最好。因為這股受國際油價的影響，而這方面的因素其實唔易估，因此股價會較波動。
加上油價在近一年，都已有一定的升幅，這刻才買入相關股票，值兢率只屬中等。如果你想買這股，不是不可，但這刻未必適合太大注。
另外，對新手來說，可投資較為入門及穩定類的股票，最簡單就是盈富（2800），你可以以這股為投資的重心，再配以其他股票。（對照龔成信箱：Q5791）
8.牛熊證重貨區
老師，請教你關於牛熊證重貨區對大市有沒有影響升跌的指標/啟示？
對散戶而言，有甚麼值得留意？
例如現在牛重貨區現處於29500-29599, 熊重貨31000-31099。我們需要留意這些資料作為走貨/買貨的機會嗎？先謝老師
龔成老師：
如果你是短線投資者，就可能要留意這些資料，不過，在我過往做銀行10年，觀察了大量散戶的投資成績後，結論是短炒的散戶，都是輸多贏少的。
我地買股票，就是買企業，大市的中短期升跌，與你持有企業的價值無關，因此，你只要買入優質股，長線持有就可以了。上述的重貨區，可能對大市中短期有影響，但對長線投資者而言，完全不用理會。（對照龔成信箱：Q5792）
9.優質股
龔sir你好，
我想問中銀2388和3988那一隻較優質？
龔成老師：
中銀香港（2388）會較優質，雖然這只中行（3988）的子公司，但2388在質素上的確是較好的。3間香港發鈔銀行之一，較好的監管，賺錢能力不錯。
加上壞賬的問題，比起內銀少得多，因此在風險上做得更好，投資2388較好，長線較有增長力。不過，如果你想收息，就3988。（對照龔成信箱：Q5793）
10.歐化（1711）
請問我之前買左隻1711歐化1.5買入 現在跌到0.6左右 唔知應唔應該放左佢就算呢？
聽講會係第三季業務擴展
唔知會唔會升返啲
龔成老師：
歐化（1711）不是無質素，但最大問題是在估值上，佢的生意唔算做得好大，一年營業額只有$2億，過往3年的平均盈利只有二、三千萬，如果估值去到$6億（每股股價$0.75），其實已開始過高，有少少盡。
我不投資新股，以及上前年期不足2年的股票，就是因為估值好難，佢地的股價一定十分波動，風險好高。
如果佢無乜特別發展，價值就只會這樣。因此，好睇佢之後有無突破性發展，我唔知佢第3季會唔會擴展，但如果有的話，相信有少少幫助，但未必大，要上到較高的位，要較長時間。（對照龔成信箱：Q5794）
體驗1分鐘貸款批核 隨時提款話咁易
平遊東京不是夢！最平住宿喺晒呢到
去大阪想搵住宿？識睇一定睇呢到！
去首爾掃貨住邊好？入嚟幫你格價搵至抵住酒店！
短trip遊台北叉叉電，即訂平、靚、正住宿出發！
去旅遊想搵住宿？識睇一定睇呢到！
延伸閱讀：
月月派息基金回報9厘 有冇咁筍 三個疑問大拆解
