月供股票要有耐性 領展適合長線投資 | 龔成信箱｜經一專欄
1.通達（00698）
Q9912：
sir, 通達 我0.84買，之前有一日間由0.73升到1.1 升左40% 但我冇放，想等估值變合理 其後又跌返去0.8 我明白要慢慢等收成，但好似白白錯失時間，心態好難調節。
龔成老師：
買股票經常會出現這情況，我都面對左20年，但我比你強的位，就是心理上的控制。
其實，股價升升跌跌好平常，好多人都會嘗試捉高位，然後馬後砲想「如果當時咁就好」，但往往是知易行難。
我又假設，你在$1.1賣出，如果股價升到$2，你又會覺得唔抵。但如果我地要賺取真正的財富，就一定要學習耐性，你將會經歷好多類似之前的「錯過賣出」機會的情況，但最後的收成是豐厚的。
所以，這是一個學習，絕大部分都不願意學，令到買股票能致富的，只是小數人。
————————————————
2.市況
Q9913：
老師，我現在以每日收市價做紀錄， 再取每個月的中位數作單位紀錄，再用standard deviation 分間出三部分（ 悲觀及中性及樂觀的市況）。
以悲觀（lower 2nd standard deviation）作平價買入區間，中性(1st standard deviation)作合理區，及樂觀（upper standard deviation)佢貴價或賣出區間
悲觀(買入)PE 20.28-20.87
中性PE 25.75-31.10
樂觀(賣出)PE 36.69-42.80
但「將來盈利」以1.15倍X以往5年平均EPS?
一話用大行預測? 但Benjamin graham 提到企業一般最多可長期15% EPS增長
老師你經驗比較多，我用以上買入計法會否太保，很難實現?希望可把握黎緊的跌市，謝
龔成老師：
standard deviation這個方法，我在約20年前已做過類似的事，因為我數學欏「A」的，所以較精於計算這類方法，但由於當時沒有配合企業質素，沒有配合盈利因素去計算，只考慮股價因素，因此最後我的方法失敗了，無法獲利。
所以，standard deviation只反映近期股價，只果太集中分析，只成為技術分析的一種，令你行錯方向。
至於你以市盈率區域作分析，則可以，但記住，企業價值會因時間而改變，不能單單盲目以過往的數據去分析。
至於企業估值方面，利用盈利乘合理市盈率，是一個方法，但你要將盈利合理化，不能只用過往的數據。
————————————————
3.領展（0823）
Q9914：
龔成老師，我在數月前開始月供$2,500領展，當時成本價只是$73。
但佢已經連續3個月上到3年高，上兩個月我已經將月供額調低至$500，希望暫時避過高位，但而家佢繼續升到$89，我仲應唔應該繼續供落去？謝謝解答！
龔成老師：
領展（0823）是優質股，這類股適合長線投資，因此，建議你只入不出，長期持有。當優質股去到貴的水平，你可以減少月供，因此你的方向正確。
不過，如果是好優質的股，市場上認為這股貴得有道理，你就好難預期這股會大跌，因此，你如果永遠等跌先入，有可能永遠等。
比較平衡的做法，是你由原本的$2500，減至$1500，月供股票是一個長期策略，中間有些時間就算少少貴，都無問題，因為只要你長期，買入價就得以平均，因此你不用介意中間的某些價位。
————————————————
4.了解市況
Q9915：
Sir 你2本書 我睇完股票勝經（不過會再重睇 因為好多information 要溫習） 宜家開始80後百萬富翁
我想問，如果我想了解多d宜家個市發生緊咩事
係咪每日睇財經新聞 因為太資訊 冇睇開唔知點入手好
龔成老師：
你只要每日睇電視的財經新聞、一般新聞就得，這是最基本的，小心太多資訊反而整亂左你。你記住，我地要得到的，是「資訊」，不是「評論」。
你這刻開始，每日睇財經新聞、一般新聞，習慣左先。
————————————————
5.電能（0006）
Q9916：
請問006，29元時入的，已很多年轉到2638長遠計好嗎？有2500股
龔成老師：
可以呀，我相信你電能（0006）的獲利及收息都不少。現時電能的增加力不強，算是一隻收息股，而港燈（2638）則是一隻純收息股，股價就無增長的能力。
你長遠轉到港燈可以，這樣股價會較為穩定，股息亦是。
————————————————
6.萬洲國際（0288）
Q9917：
你好，我想問288 萬洲國際
想問佢有冇潛力同埋佢既合理價大概係多少？
老師麻煩你了
龔成老師：
萬洲國際（0288）有質素的，但潛力就不算強，只是平穩增值的類別。
這企業過往的生意保持平穩，業務基本上是平穩的，只是之前因貿易等問題，令股價較為波動，成為這股的風險。投資這股，可說是平穩增長，以及收下息咁，不要對股價太有期望。
這股現價處合理區，分注投資都可以，因股價有可能波動。
————————————————
7.睇書學儲錢
Q9918：
龔sir我搵左幾年錢，但唔識理財，頭幾年完全儲唔到錢，我想問有無書建議我去睇，可以幫到我去理財。
龔成老師：
你可以睇《80後百萬富翁》、《股票勝經》，這是入門類的書，好適合你。
盡快增加理財知識，盡早開如理財，對你好重要，因為愈早開始，你就能盡早利用複息滾存的力量。
————————————————
8.銀娛（0027）
Q9919：
銀娛17年報表多左238億金融資產，想問是什麼，如何分析合理性？
近年負債開始多，有影響優質程度嗎？
龔成老師：
銀娛（0027）持有左一些金融資產，當中主要是「持有至到期日之金融資產」，裡面包括「香港上市債務證券」，以及「海外上市債務證券」，由於是持有到期的債券，因此本質上風險不高。
而睇翻佢的負債，近年的確有增加的情況，這難免會扣少少分，不過，這企業本身的負債不算多，現時的負債比率，仍處接受的範圍，加上佢每年的經營活動現金流量，有約$100億，因此更不用擔心。
————————————————
9.保利協鑫能源（3800）
Q9920：
龔成老師，有問題想請教下，屋企人持有保利協鑫能源 （3800）15000股@2.41。
我見佢市盈率大概5倍，近兩年ROE 有8-9%, 尚可接受（當然同信義光能有30%ROE無得比），但保利協鑫屬於清潔能源行業，看似有前景，應唔應該繼續持有？謝謝
龔成老師：
保利協鑫能源（3800）質素一般。
我地分析企業時，當然會以ROE等作為分析指標，但記住，這並不是唯一的指標，這企業的過去盈利比較波動，成本因素令佢處於盈利不確定的狀態，這令佢處較被動位置。
另外，這股過往是散戶其中一隻炒股，我最怕就是這類。
這股的過住股價波動好大，雖然市盈率低，但之前公布的中期業續，盈利已跌7成，按這個推算，市盈率將會去到12-17倍，因此並不平宜。
這股質素一般，不適合持有太多，可以考慮反彈後先賣出一半，餘下再等下先決定。
————————————————
10.月供股票
Q9921：
老師，睇完你所有著作，已經一步一步跟住你既方向去行
月供既部分經由恆指32000到24000再到今日29000,一直都係賺緊錢,開始感受到你所講投資優質股既重要性
不過手頭先仲有幾隻股票係大時代個陣入貨，一直持有至今，亦知道大部份都唔屬於潛力或優質股，所以想請教一下應該點部署
8225 持100000股
2623持10000股
1816持20000股
1480持10000股
547持100000股
460持5000股
不勝感激
龔成老師：
月供股票的原理，是長期儲資產，因此不用著重中短期的價位，以「儲」的模式進行就得，重點是長期。
另外，你要明白一個投資概念，我地繼續持有一隻股票與否，重點是企業的質素、前景，買入價並不是因素，這只是一個心理位，你唔好比佢影響。
中國醫療集團（8225）質素好普通，這類股小注好了。
愛德新能源（2623），企業年年虧損，無投資價值，賣出較好。
中廣核電力（1816），有投資價值，可持有。
恩達集團控股（1480），過往玩財技，對這股有保留（如果你有上過我堂，就知我用左唔少時間去講這股的價值唔高）。
數字王國（0547），企業年年虧損，無投資價值，賣出較好。
四環醫藥（0460），過往核數師對佢盤數曾出現「保留」意見，又停過牌，對這股有保留，賣出較好。
