日出康城奇特「港鐵生態圈」似坐監？居民護城反駁：我哋住新樓，仲有靚會所
日出康城居民陷入「港鐵生態圈」
網民指出，住在日出康城等鐵路盤最大問題是，日常生活衣、食、住、行都離不開「港鐵生態圈」，矛頭更直指97後的商場上蓋樓：「閒閒哋幾千戶棟棟至少三四十層迫晒喺商場樓上，將軍澳線同東涌線大把。」
樓主分析，商場上蓋樓的居民，落街第一步就已經進入商場。幫襯入面舖頭餐廳等於幫你座樓嘅發展商交多筆管理費，例如康城屬於港鐵嘅，住嗰度除咗要向港鐵交管理費。「去樓下商場食飯，餐飯有部分錢去咗交租，份租又係俾返港鐵。」
「再加埋返放工時間轉lift大堂嘅人流真係好誇張，如果向內園嘅感覺仲明顯，但好多香港人一家大細又好buy呢類模式。」
網民：幢幢70層樓嘅圍城！
貼文一出，隨即引起一眾鐵路盤居民熱烈討論，有居民和議，認為日出康城等商場只有大型連鎖餐廳沒有特色，民生配套亦單調。
- 「真，設計到唔係一條直線就返到屋企、勁唔方便」
- 「無地鋪全部都係大型連鎖餐廳，食物選擇單一同埋唔好味。」
- 「太過追求供應喇，而忽略整體社區環境，幢幢70層圍城。」
- 「民生配套麻麻地，太少商店同文康設施。」
居民「護城」：康城將軍澳環境最靚。
亦有康城居民隨即「護城」，認為康城環境在區內數一數二，而且會所、商場配套齊備，至少落大雨亦不怕被淋濕。
- 「有瓦遮頭好方便。」
- 「康城個優點係新樓靚會所。」
- 「其實康城算全個將軍澳環境最靚。」
- 「唔明有乜問題，唔通落大雨行舊墟搵平野食搵特色野咩。」
- 「不過個個生活模式都唔同，有啲人的確出門只係返工放工，連買野都只靠網購唔落街，咁的確康城係無咩問題。」
MONTARA SSD期滿即沽 蝕逾56萬
至於區內交投方面，日出康城近期亦錄得蝕讓成交。
將軍澳MONTARA有業主趁三年額外印花稅（SSD）期限鬆綁，以780萬元沽出中層兩房戶，低市價4.3%。原業主持貨三年多帳面蝕讓11萬元，如計及基本使費，料需實蝕逾56萬元離場。
中原地產高級分區營業董事柯勇表示，是次成交為日出康城7A期MONTARA 2B座中層C室，實用面積450平方呎，屬兩房間隔，屬開放式廚房設計，單位座向東方，望開揚內園景，單位新近以780萬元易手，呎價17,333元。
據悉，原業主於2019年5月以791萬元買入物業，持貨三年多，是次沽出單位帳面蝕讓11萬元，單位期內貶值約2%。如計及當時入市繳稅約29.6萬元，及買入賣出的佣金約15.7萬元，料實蝕逾56萬元離場。
免責聲明：本專頁刊載的所有投資分析技巧，只可作參考用途。市場瞬息萬變，讀者在作出投資決定前理應審慎，並主動掌握市場最新狀況。若不幸招致任何損失，概與本刊及相關作者無關。而本集團旗下網站或社交平台的網誌內容及觀點，僅屬筆者個人意見，與新傳媒立場無關。本集團旗下網站對因上述人士張貼之資訊內容所帶來之損失或損害概不負責。
