新地降呢吸平民化租戶 向現實跪低︳凍鏈茶專欄
廣告
新鴻基地產(0016.HK)旗下一田百貨位於沙田嘅旗艦店，年初傳出業務重整，多個本來新裝修好嘅專櫃，包括化妝專櫃、休閒/運動服飾及內衣飾品等全部結業清貨，淨返超市繼續營業。今年一月嘅時候，一田被問到沙田旗艦店是否結業時就否認，表示只係百貨部門會以全新面貌重現。一轉眼嚟到聖誕節，發現一田舊有專櫃位置已經靜悄悄開業。
睇一睇商戶組合，新地今次都算「神機妙算」，與期死守租俾無生意嘅名牌，不如改行街坊路線殺出另一條血路。一眾新鋪包括近日開到附近梗有一間嘅茶記牛奶冰室、譚仔、Delifrance；仲有手搖飲品店、首次進駐新城市嘅冒險樂園、衣飾百零蚊就有交易嘅boutique，同埋精品文具店，反而貴價化妝品店就一間都無影，而最重要係竟然有「窮人恩物」suziya 牛丼，最平一個餐29蚊仲要唔使加一，食豪少少都唔使一嚿水。
不過要穩住盤生意，宜家最緊要唔係收入，係人流。眼見隔離幾個商場，例如沙田廣場、希爾頓等喺市况滲淡之下，都叫做有街坊頂住，新地都不得不向現實低頭，吸納平民化租戶。不過，幾個商場依家變晒做同一個級數，睇怕之後都要繼續爭崩頭。正面啲咁睇，商場有競爭，一班街坊消費者有望受惠。
相比之下，呢個聖誕節，幾十萬人出境。尖沙咀、銅鑼灣都一潭死水，又難怪，返大陸咁多選擇喎！呢期除咗一些比較有性價比嘅貴價嘢，好似半島酒店自助餐，仲可以keep住有擁躉之外，其他扮上菜嘅貴價餐廳幾乎可以直入唔使book。睇嚟其他發展商都係時候，向新地學習下﹐點樣向現實低頭。
免責聲明：本專頁刊載的所有投資分析技巧，只可作參考用途。市場瞬息萬變，讀者在作出投資決定前理應審慎，並主動掌握市場最新狀況。若不幸招致任何損失，概與本刊及相關作者無關。而本集團旗下網站或社交平台的網誌內容及觀點，僅屬筆者個人意見，與新傳媒立場無關。本集團旗下網站對因上述人士張貼之資訊內容所帶來之損失或損害概不負責。
