準備5年後退休有自住物業 月供收息股 港燈工行置富｜龔成信箱｜經一專欄
撰文：龔成｜圖片：新傳媒資料庫、unsplash
1.收息股
老師，我55歲，準備5年後退休，已有一物業自住，已有兩份各30萬的儲蓄保險收息
已月供：
2800 $3,000
0066 $2,000
0002 $3,000
0388 $2,000
另持有4手0700、10手2638、
10手2800、5手0066、3手0003
另有200萬現金可投資
亦可增加$10,000月供股票
請問如何增加及整理資產，望5年後每月有$30,000現金流？
龔成老師：
這刻距離退休只有5年時間，投資就不能太進取，你宜慢慢增加收息股類別，為現金流作準備。你月供上述4股可以，但最好同時月供收息股，例如港燈（2638）、香港電訊（6823）、工行（1398）、置富（0778）為你將來收息作準備。
同時，你要在這5年，把握投資時機，慢慢將$200萬資產，轉為收息股，以及部分盈富（2800）（當然，仍要留起一定的現金）。在一般的市況，你可以分注投資收息股，當見到這些收息股股價有較大下跌時，就可以加大買入的力度，咁樣去儲貨，等你退休時有較多的收息股持有。
到5年後，你要將盈富（2800）等幾隻平穩增值類股，轉為收息股，令你有較強的現金流。
至於你現時的儲蓄保險，就繼續保持收息，不用特別改變，持有可以作財富平衡，以及有持續現金流。
由於5年時間不算好長，因此是否做到現金流$3萬，仍有未知數，只能儲力在這段時間加強儲蓄，以及適當投資增值。
（對照龔成信箱：Q8698）
2.強積金
龔成, 恒指及美股由高位下跌唔少, 身邊朋友叫我把強積金轉去保本/或其他有利息派基金, 到恒指/美股上升才轉回( 股票或恒指基金)。
請問是否須按出面經濟/ 股票環境, 把強積金轉來轉去。 我見自己強積金, 因外圍經濟下跌, 唔見左4萬幾
龔成老師：
強積金唔好轉來轉去。
好多人都以為自己可以估到大市的發展，但根據我過往做10年銀行，接觸了大量散戶的經驗，佢地成日估個市點走，最後都唔會出現，反而簡單持有優質股，長線投資的散戶，表現最好。
你成日轉來轉去，有機會在低位賣出，高位追貨。
強積金是長線投資，中間上落唔洗理，雖然這刻賬面虧損，但之後會慢慢升翻。
我地管理強積金，其實好簡單，你只要按你的年齡作分配，年輕時進取，中年時平衡，年長時保留，以這個去分配，慢慢因年齡而調整，咁就得。
（對照龔成信箱：Q8695）
3.小米集團（1810）
老師，最近我見1810跌唔少，請問現在入手合適嗎？另外有咩股推薦？
龔成老師：
小米集團（1810）其實在估值上並不容易，因為佢生意不錯，產品受歡迎，但這刻未有具體的盈利，市場只能以往後的業務、盈利情況，去估這企業值多少錢，這無可避免令這股的股價好波動。
現時估值，算是合理區的較上部，仍然未算平宜，不過之前就有少少貴。如你投資，可以，但不要太大注，同時要明白佢股價會較為波動。
盈富（2800）、金沙（1928）、港鐵（0066）、長建（1038）、中銀（2388）、領展（0823）、粵海（0270）都是可以考慮投資之列。
（對照龔成信箱：Q8696）
4.外國股票
呀成，你點睇香港以外的股票/基金？
比較起香港的黎講要研究既時間，玩法同增長係咪差唔多？
龔成老師：
投資外國股票，都是一個分散地區風險，同埋增加自己「可投資範圍」的方法，只要做得好，的確可以提升回報。
但前提是，我地只會投資「自己認識的項目」，所以，你要確保對這些股票，基金，有充份的認識。
投資原理同香港一樣，但就可能要花多少少時間，等自己對該企業的經營背景、情況，有更充足的認識先。
（對照龔成信箱：Q8697）
5.房託
龔成兄，我一直想買入房託作為防守類股份，房託中大家都知道領展係非常優質股份，但一直處於不便宜水平，抗跌力非常強，所以一直沒有好位買入，如果退而求其次選擇陽光/置富/越秀，3隻之中邊隻最為優質?
另外楓葉教育及綠葉製藥屬優質潛力股嗎？看他們財務數據表現都不錯，如是潛力股，合理買入市盈率區間是多少？謝謝
龔成老師：
房託是很值得投資的類別，領展（0823）的確優質，但又的確略貴，但月供仍可以。如果要在這3隻選，置富（778）會較好（其實3隻都很不錯，都可以投資）。
置富係香港持有17個私人屋苑商場，物業組合包括約318萬平方呎零售空間及2713個車位。屋苑商場的租金穩定更是優點之一，加上佢的出租率處高水平，過往加租的情況理想，因此有長線投資的價值。
楓葉教育（1317）有質素，過往股價處貴水平，近期回落算是返回合理水平，但要留意股價波動較大。這股前景正面，是潛力股，但就要控制好注碼。
綠葉製藥（2186）都有一定的質素，但之前醫藥股熱炒，處貴水平，近期算是合理翻，這股都是潛力股，但股價同樣較為波動。
（對照龔成信箱：Q8699）
6.長線投資
老師，經常聽你講長線投資，但我有一點唔明，就係長期持有優質股，然後到有需要先放，定係作收息，變相令資產增加？
龔成老師：
首先，我地以「建立資產」為大前提，要思考如何在風險平衡的同時，令財富最大化。
當我地持有優質股，只要企業仍有質素，長遠前景仍正面，持有愈耐對我地財富最有利，可助我地財富不斷增加，除非出現股價明顯地高過企業價值，否則一直持有是最好的。
但我地都有可能因人生階段而重新配置資產，因為以「先增值，後現金流」作配置，我地持有增值類優質股，當到了一定年齡後，就賣出，轉為收息股，這樣的策略較好。
（對照龔成信箱：Q8700）
7.港燈（2638）
你好，睇過你好多Post，你講到恆指成份股每年6-10%利潤好似好簡單，但係入面好少有股票每年都有6-10%。
就算有都係每年的波幅或者估值過高股票繼續炒上，可否分享下選股？
龔成老師：
我同過恆指50年的數據去計算，得出以複息計，恆指升幅連股息為14%。當然，中港經濟現時已無以前咁強，但要有10%其實都合理的。
大多人會中間不斷出入，但只要長線投資，基本上已有唔錯的回報。
我就用阿媽做例，幾年前投資港燈（2638），這是佢最重貨的一隻，只入不出，長期收息，平均買入價$5.5，現價$7.5，每年股息6%，你計下，佢簡單的投資，每年的平均複息回報，已有10%-15%。
你唔算要理炒上這類因素，你要明白，買股票就是買企業，你只要投資有經濟優勢的企業，企業價值就會保持向上，同時佢派出的盈利部分會令你得益，這就是你選股的方向。
（對照龔成信箱：Q8701）
8.黃金
你好，我31歲，從2014開始有投資基金（每月供款- 頭年半$4,000，之後改為$1,000）（年期20年）
2016年，美國總統大選前，從投資基金，選擇了，兩隻黃金基金，直至現在，已虧損了很多（5位數）
由於投資基金，不能終止計劃，是否應該將黃金基金內餘額轉去另一基金 or 仍然等待黃金價格上升？
龔成老師：
我地最重要是建立一個財富組合，當中可以有不同的資產，令組合平衡，黃金有投資價值，但不能過多。
黃金可以理解為「終極貨幣」（詳細你可睇《大富翁致富藍圖》），所以有持有的價值，同時可以對沖大型黑天鵝事件。不過，由於黃金沒有現金流產生，所以不用持有太多，只需要在組合中佔有少少就得。
所以，你轉唔轉，反而睇翻你該基金，佔你組合比例的多與少，如果是過多，不如轉去另一基金。
（對照龔成信箱：Q8702）
9.煤氣（0003）
成哥：上網睇過你對煤氣0003既評語，你話10送1股只係數字上遊戲，股價會因此下降所以冇分別。
我就諗呢個講法其實都適用於派息，除淨後股價都會下降。
如果係咁結論會否變左派息率高低/送幾多股已經冇分別
但係心理作用除淨後個價跌左，普羅大眾會覺得抵就托高番個價，變相除淨跌個價位會自動補償番
股票市場新手，以上既講法有錯請拜託更正，謝！
龔成老師：
煤氣（0003）是優質股，由於佢每年都有10送1，雖然股東股數得益，但股價會自然下跌10%。佢股價多年都無太大變動，這反映佢真實的升跌每年都超過10%。
除淨當然適用於股息，當企業派息，原本持有的現金減少，例如之前的企業價值是$110億，當佢派息後，例如將其中$10億現金派出，佢價值會減少了$10億，所以股價都會有這數目的市值下跌，這是自然的事。
這個與托高番個價無關，只是一個合理的自然調整。
「派息率高低/送幾多股已經冇分別」，你要明白，我一直所講的無分別，是指除淨前後的股價，以及企業價值，因為這是一個左右手數的問題。
但如果一間企業，佢本身的派息比率有變，這就會影響到企業的長遠發展，同時會影響股價，以及市場價值，因此這又是另一個概念。
（對照龔成信箱：Q8703）
10.優質股
老師你好，如果月供幾千蚊好似比較慢先有一手，你會建議我一邊月供，一邊觀望優質股的價格，當價格較低時一手手買嗎？
另外，你會建議先集中供一兩隻股，還是一次供六隻會較好？ (每月供一萬)
謝謝老師
龔成老師：
兩者並行會較好，現時大市處合理水平，最好用一邊月供，一邊儲現金的方法進行，因為如果一直等價跌，而最後無跌，就會輸左機會成本。
所以，現時以分注模式入（例如月供），是最好的，但由於大市又唔算平，所以留現金，到有較大回落時再一手手咁去入。
如果月供$1萬，供4隻是較為合適的。
（對照龔成信箱：Q8704）
