36歲揸$10萬現金 想投資收息股 可考慮港燈 陽光 置富｜龔成信箱｜經一專欄
1.收息股
你好呀，我有問題想問你呢，我之前買了 5(400股），939(3000股），1928(400股），1816(1000股），6886(200股）；我想問1816 和6886前景如何？（這兩隻是新股抽，現都未返到家鄉）。
我今年36歲，暫時沒有做野，我現10萬想買一些股票收息和增值，你有甚麼意見比我呢？初部想買2800, 5, 1038 和 778。 謝謝
龔成老師：
滙豐（0005）、建行（0939）都是有質素的，可持有，長線投資就得。
中廣核電力（1816）其實本質不差，最大的問題是過往一直處貴的水平，近年才開始回到合理區，佢以貴的價位上市，如果只是小注，就可以持有，但就要多點耐性先上得翻去。
ＨＴＳＣ（6886）算是不過不失，規模大，有一定的生意，但賺錢能力不算強，持有的價值只算中等。如持有較多，可賣出一部分先。
至於你持有$10萬，其實以你的年齡，比較適合投資平穩增值類別，但如果想投資收息股，都無問題，可以投資港燈（2638）、陽光（0435）、置富（0778），都是你可投資的收息股。
（對照龔成信箱：Q9133）
2.物業
龔成老師，本人36歲，月入$40,000，有現金$700,000，另有價值約$100,000港幣的外幣在手。
本人與家人聯名有一層樓，但我希望於40歲前置另一層物業，在投資上應怎樣作部署？求賜教!!
龔成老師：
由於聯名都計算你有物業，當你再買另一物業時，政府會收你重稅，所以，你日後要將物業拆名，然後再用自己的名買樓，咁樣就較為化算。
你距買樓仍有一段時間，可以把握這段時期好好為財富增值。現金$70萬，這刻可以將其中的$40萬投資股票，集中在優質、平穩增值股，例如盈富（2800）、港鐵（0066）、中銀（2388）、金沙（1928）、恆基（0012）等，不要一次過入，要分注慢慢投資。
至於餘下的$30萬現金，就持有現金，但若果見到大跌市出現，股價進入平宜區，就可把握機會掃貨，之後會令你財富有明顯的增值。這部分的增值會要求你有投資技巧，你最好在這段時間，學習選股、企業估值、投資時機等這類知識，只要這部分做得好，財富增值會更強。
另外，你現時月入$4萬，如果可以將當中的4、5成，用作投資，做月供股票，投資平穩增值類股票，你能累積到一定的財富。
只要做到上面策略，在40歲應該能滾存到$200萬-$250萬，相信能助你成功投資另一物業。
（對照龔成信箱：Q9127）
3.ＣＥＣ國際控股（0759）
龔老師，您好。
本人36歲，自問多年來於股市不是投資，似賭錢多。剛剛拜讀完您的著作，深有感受，痛定思痛想重新出發。
3年前初入股市睇D垃圾消息，買左D零價值殼股，如139，48，8120 三隻都蝕足90%以上，損失約6萬。
之後就盲目跟人入市買759，2.1入，跌時一路唔識走，坐到依家。
1357 就7.6入左12000股，2039就7.5入左10000股，189就6.5入10000股。
再加上其他牛熊被殺，粗略計算3年來共損失50萬，心痛非常。
本人期間當然有買優質股，但如您所言，賺少少就離場，而唔係跟其價值去衡量，最後嫌貴唔買以為佢會跌，就賺粒糖輸間廠。
之前損失慘重而又未放的759，1357，2039，189，請問我應否全部斬手指離場?
本人再不會沾手垃圾和牛熊。每月有20000空閒錢想重新出發，但未有機會參加你的講座，未懂計算合理價入場，請問現階段入場月供會否又變高入呢?
如每月20000閒錢，想以退休無憂為目標，請問應如何分配? 感謝回答，及感謝您書本的內容打醒我。
龔成老師：
你最好重要你的投資思維，明白翻正確的投資概念，下一步就是重組財富組合。
首先，我地買股票就是買企業，同時要長線投資，而投資的一定是優質股。而決定我地繼續持有一隻股票與否的，不是你的買入價，而是該企業的質素、前景，買入價只是一個心理因素。
ＣＥＣ國際控股（0759）質素一般，原本開零食生意不錯，但後來又搞其他野，反映增長到了頂點，而強行投資其他類別，出現了拉低回報率的情況，這類股最多小注持有。
美圖公司（1357）是高風險類的公司，雖然業務增長快，但過往一直處虧損狀態，你當這類公司博下就算，最多小注投資。如你持有太大要將部分賣出。
中集集團（2039）質素中等，（2039）受貿易因素影響，相信中短期仍會較弱，但只要過左，就會好轉，雖然未必大升，但到時反彈先賣出會更好。
東岳集團（0189）質素算是中等，股價比較大的波動，都可以持有的。
你最好做月供股票，將每月如$13000，投資在月供股票之上，以你的年齡，可投資平穩增值股類別，盈富（2800）、金沙（1928）、港鐵（0066）、長建（1038）、中銀（2388）、恆基（0012）等，助你財富合理平穩增值。
（對照龔成信箱：Q9128）
4.工行（1398）
老師，睇你Facebook 一段時間，好欣賞你的投資態度，學到不少，謝謝。我一向都是奉行長線投資方法，我有些內銀如939、1398都是好低位買入持有超過十年。
經歷高低起伏，今年頭高位曾想沽出候低再買入，但冇做到。現在環球股市似乎跌勢不止，你有什麼高見呢？
龔成老師：
工行（1398）、建行（0939）是不錯的收息股，你可以長線持有，當係永遠收息都無問題。但這兩股的增長力有限，過去是這樣，將來都是這樣，不因此不要對股價有太大的期望。
所以，你要清楚翻自己的投資目標，如果你想長期收息，就繼續持有，除非佢股價的升幅已等於你10年的股息，否則不用賣出，一直持有都無問題。
若然你投資的目標是財富增值，就要想想這兩股是否適合你。你可以考慮賣出兩股，例如在這兩股升多少少後賣出（高位未必足到，在適當的位置已可），然後將資金投資增值類的股票，例如盈富（2800），咁就得。
（對照龔成信箱：Q9129）
5.太平洋航運（2343）
想問問
你點睇2343太平洋航運
龔成老師：
太平洋航運（2343）質素屬於中等，佢都算有規模，有一定的資產，但業務就比較波動，這亦是行運業的典型風險，加上近年貿易上的風險，佢風險就更高。
睇翻佢過往的業續，有時處於虧損，有時又出現盈利，當務不確定性高。前景亦好難分析。
投資的價值只屬一般，除非見到好平，否則不要心急投資。
（對照龔成信箱：Q9130）
6.優質股
你好啊！龔成！
我睇曬你出既甘多本書啦！真系受益良多！并且而家開始接觸股票，有股票如下：
1211 比亞迪 500 @$55.8
0178 莎莎 2000 @$3.17
1929 周大福 2000 @$6.72
1177 中生製藥 2000 @$6.22
并且月供2800盈富 和 1928 金沙 各$3000已經2個月了。
有以下問題：
1. 0178莎莎 買入後就一直跌，我應否止蝕 放出？
2. 1177 中生製藥 都系買入一直跌 ，現價我應否增持多2手，平均返個買入價？
3. 我呢個股票組合，5年後可以草到$100萬做首期嗎？
補充： 1211 比亞迪 若然跌到$50 我應否增持平均返買入價？謝謝
龔成老師：
你持有的都是優質股，部分有潛力，基本上可以一直持有，不要理會中短期股價上落。但要留意，潛力股的風險較大，投資時要慢慢分注入，同時不能佔組合的比例過多。
1）這是有質素的股票，你不應因「買入就跌」而定義佢為無質素，「價格」同「價值」是不同的。佢仍面對中短期香港電售較弱的情況，但本身有質素，耐心持有就得。
2）中生製藥（1177）佢將會面對行業競爭加大的情況，相信中短期仍會較弱，不過，行業慢慢會整合，反過來對佢有利，因此長期仍正面，不過就要多點耐性。可慢慢分注入，但不要急，每次要隔較長時間先入。
3）單靠現時的股票增值仍不足夠，最重要是你之後的投資。現時每月月供$6000，如果你每月在月供同時，仍可儲到$4000以上，那成功機會能大增。你先將這些儲現金，不要心急動用，同時，好好在這段時間學投資，在選股、企業估值、投資時機裡下功夫，只要把握到股市回落時的機會，相信要滾出$100萬以上是不難的。
另外，比亞迪（1211）可以增持，因為這是合理價，但要注意這股佔你組合的比例，不能過多。
（對照龔成信箱：Q9131）
7.中生製藥（1177）
老師你好， 1177 早前回購約490萬股，作用是甚麼？ 現在買入價位是平嗎？
龔成老師：
中生製藥（1177）回購股票，代表管理層認為這刻的股價不貴，可以在市場上買入，同時有穩定股價的作用。管理層是最了解公司的人，當佢地決定買入時，代表股價已落到一個不貴的水平，佢地都認為是投資時機，就會買入。
一般來說，如果公司回購股票，之後就會註銷，令總股數減少，從而提升了每股的價值，即是一種間接提升股東利益的方法。
這股仍未到平宜價，現價仍只是合理價。
（對照龔成信箱：Q9132）
8.佐丹奴國際（0709）
請問佐丹奴這股票質素如何？
現時有9％息率，可以長期持有收息嗎？
龔成老師：
佐丹奴國際（0709）質素不差的，業務穩定，但就無乜增長力，這類股是適合收息的，你可以投資長期收息，但就不要對股價太有期望，始終業務增長力不強，而管理層都無乜心想公司增長。
（對照龔成信箱：Q9134）
9.EPS
龔Sir，我係你舊生，最近分析緊領展有小小野想問
一）佢個EPS果到我應該點樣計？用佢個（股東應佔利潤 – 物業升值部分 – 其他非經營項目）除（發行股數）OR 用佢個毛利除發行股數？
二）領展既負債問題計到佢既流動比率幾年都低過1，但計返個利息覆蓋率佢又唔算有大太問題。姐係佢負債比較多，但利息方面都可以支持到？
三）如果以佢本身比果個盈利計，計到佢PE得3左右，但扣返升值的因素，佢實際2018年EPS只得2.35左右計到佢個PE其實差唔多33倍，對於房託黎講已經貴？我咁計岩唔岩？
四）其實咩叫資本化率？佢用DCF Model當個Rate黎計，而且好似好低咁，睇返佢既年報，一d地區如天水圍既商埸都計到市值20億左右？我覺得依部分係咪有水分係到令佢估值太高？
龔成老師：
1）你要睇佢的年報中的損益表，先可以找得到，EPS會包左物業重估的，即是收租減去營運支出，加上物業重估，除了發行股數，就是EPS。
但由於EPS包左物業重估，所以作用有限，所以，我地可以用更簡單的方法，去找出能代表佢賺多少錢的數。第一，佢年報有講無包物業重估的數是多少，即是「可分派盈利」。第二，你只要用佢的派息作計算就得，因為佢的派息比率要超過9成，即是派息同「可分派盈利」，其實好近，所以用派息已可以。
2）你可以咁樣理解。我地負債會從多個角度去分析，流動比率、負債比率、利息成本、現金流等，立體去分析整間企業。
雖然佢流動負債略高，但問題不大，加上佢現金流強勁，不用擔心。
3）你應該以扣除物業重估後的數字去計，否則會計錯數。
4）其實呢個上堂都有簡單解釋過，其實是一些回報率、回本年期、資本的長期回報化做現值的類似方法。其實佢在年報裡的附註有講的，只要將佢年報提供的租金，除以一個資本化率，就得到了一個估值的數，而這個資本化率是多少，其實是由估值師決定，最簡單的就是市場要求的回報率，就是資本化率。
由於這些有可能出現主觀的估值，所以我地投資者，不會對佢物業的估值多少太著重，反而會睇翻具體的指標，例如租金，因為有實在的現金流。
（對照龔成信箱：Q9135）
10.銀行股
老師我想問，平安保險其實同銀行股已經變到差唔多，雖然浮存金成本好低，但如果持有銀行股最好係咪唔好再持有保險股。
因為兩者既收益都受投資表現影響，而且平安雖然有增長力，同低成本既資金運用，但佢好似依家唔理風險咁咩都做，唔知你點睇呢
龔成老師：
佢地有相同的地方，但本質始終不一樣，銀行有存貸業務，資金的本源是存款，而保險企業本身是保險業務，這與銀行的所面對的風險是不同的。
不過，兩者的確都會做投資這動作，將資金投資在不同的項目，就算大家都投資在金融市場是可能的。
你可以同時持有這兩類股，始終本質有彩不同，但就的確同樣面對金融系統的風險，因此，不應同時持有過多就得。
（對照龔成信箱：Q9136）
