好想有穩定現金流收入 6隻收息股組合 平均6厘息｜龔成信箱｜經一專欄
1.收息股
老師，我朋友10年前買入2800，現在收緊7厘息，但現在打算退休，想穩定d沽2800換收息股如港燈，但收息股現息率只有5厘，請問還值得換馬嗎？
龔成老師：
如果佢打算退休，的確是值得轉成收息股的。
因為退休人士需要的不是財富增值，而是穩定的現金流，因此將盈富（2800）賣出，同時轉換成收息股是較好的，除有現金流外，同時可減少當中的風險。
最好建立一個收息股組合，港燈（2638）、香港電訊（6823）、工行（1398）、置富（0778）、陽光（0435）、深高速（0548）等，平均有5%、6%息。
由於你計算7%時，以當時買入價計，當你以現價將盈富賣出，將資金投資上述收息股，其實收息金額會明顯增加，因此值得做。
（對照龔成信箱：Q9250）
2.華僑城（3366）
龔成，再次向你請教！請問這三隻股票（3366，709，117）的前景如何？
3366及709正52週低價附近，適合長線持有嗎？而117代人問，適合中短期搏反彈嗎？
龔成老師：
高低位不一定等於平貴，所以唔可以單憑所謂的52週高低就決定投資。
華僑城（3366）經營旅遊主題公園、開發及銷售住宅，以及開發及管理物業，亦有製造及銷售紙箱及紙製品：該分部製造及銷售紙箱及紙製品。質素算是不過不失，但不是高質素，股價波動大，小注可以。
佐丹奴國際（0709）是不錯的收息股，但增值方面則較弱。
你睇翻佢的財務數據，可以見到佢近幾年的生意幾乎無增長，雖然盈利有上升，但不多，只是一些基本的增值。同埋，佢的派息比率好高，作為收息當然不錯，但你可以見到，管理層將大部分所賺到的盈利，都用作派息，保留盈餘好少。
即是管理層都無乜心想發展，只想守住原有的地盤就算。所以，這股的增長力有限。這股都可月供收息的。
至於天利控股集團（0117），業務波動，過往更出現數年虧損，有少少保留。這股唔易玩的。
（對照龔成信箱：Q9251）
3.新世界（0017）
成哥,,其實你會唔會留意埋恆基同新地接班人既問題？
因為舊陣時新世界就系因為接班人問題，收購左唔小不良資產，但眼觀新地系接班方面，好似成個家族都仲健在比恆基得四叔一個睇住穩健不少。
龔成老師：
這都是一個問題。
其實，這些企業去到咁有規模，除非接班人好大喜功，否則只要穩穩定定，已經能正常發展，我相信佢地都明白這個道理，因此唔洗太擔心。
新世界（0017）當時處中港經濟發展期，接班人會比較心雄，但10年經濟經歷左唔少，相信接班人都明白當中的風險。加上我睇好恆基（0012），其中一個原因是佢持有的農地，我相信土地這類資產，好難「敗家」的。
（對照龔成信箱：Q9252）
4.金蝶國際（0268）
龔sir,
1)你的新書會不會定期出修訂版，因為股價變動可能令一些潛力股變得值博！
2)請問金蝶的便宜價是多少？
3)你認為現時的市況在股市週期的那個位置，及原因點解？
謝謝！！
龔成老師：
1）會久不久出修訂版，可能一年修訂一次，因為要更新財務數據。有可能令某些股票變得值博。
2）金蝶國際（0268）這股是有質素的，但一直處貴水平，這刻連「合理區」都未到，若要講「平宜區」，起碼要跌一半有多，先叫初步平宜。
3）現時大市在合理區較下部。我地最初步會以恆指市盈率作分析，過往幾十年，恆指最低市盈率約8倍，最高約24倍。當恆指跌到10倍以下時，就會初步確認為進入平宜區。
如果以現時的情況，大約24000樓下（這個數會改變的）。
（對照龔成信箱：Q9253）
5.華晨中國（1114）
隻1114 差嗎？近年跌好多！
我覺得已經可以買黎投資
師兄點睇，唔該！
利申我無貨
龔成老師：
華晨中國（1114）本質唔差的，但中國整個汽車行業，的確有放緩的情況，加上競爭加劇，所以中短期仍不利，你見唔少汽車的銷量都回左，就知的確有困難。
同埋，佢品牌的市場並不是行低端，而這路線對經濟的敏感度較高，當經濟回落時，影響較大，因此，市場對佢的股價反應都較大。
其實現價已有投資價值，但中短期佢仍會處不利環境，股價不會強。但長遠計，佢仍是正面的。
（對照龔成信箱：Q9255）
6.外匯
龔成老師，有一些關於外匯既問題，有個例子: 我係AASTOCKS 網站睇到今日加拿大元對港幣 = 5.7456
但我在恆生銀行看到的價錢是
5.78左右
咁我想問下aastock 既報價係咪綜合左好多方面之後既報價？
實際市場其實無aastock既報價？
龔成老師：
好多時，財經網站只報出一個外圍的成交價，或外圍所開的價，這個價可能真的有成交，但就不是一般的散戶成交，而是國際市場成交。
當一般散戶要買賣時，就會有一定的差價，因為銀行一定要賺錢的，否則就營運唔到，所以，一般散戶所買的價，都會比見到的價較差。除非你是大額交易，又或做孖展。
（對照龔成信箱：Q9256）
7.領展（0823）
老師，多謝你回覆，你話比亞迪同盈富可以繼續月供，中生製藥都可以月供，言下之意係領展唔建議繼續月供？
另外，睇左你本新書，50隻優質股，想開始供埋銀河，因為銀河我都經常去，較熟悉同時都覺得銀行比其他賭場做得更好，如果月供咁多隻，想問我月供比例應該點分配？
謝謝你既解答！
龔成老師：
最後都要由你決定。
如果你想增加組合的潛力，就可以停止供領展（0823），而轉供一些潛力股如比亞迪（1211）。
如果你本身有足夠的資金，我當然建議你同時供領展及潛力股，但你要睇下你能否平衡。如果將資金分得太散，你每月的供款金額每隻會變得好少，要供較長的時間才有一定的股票。
至於銀娛（0027），這都是有質素的股票，都值得做月供。但都是這個問題，你要想想點樣取平衡，如果每隻都供，的確有分散風險的效果，但就金額可能較少。
又或者，你這刻每集中供某幾隻，之後到了有更多資金時，再加上其他股去月供。
（對照龔成信箱：Q9257）
8.潛力股
Hi龔成，我月供股票$30,000已經半年。我成日都OT額外搵錢，每月收入約$90k-110k，$18k比家用，$30k月供股票，其餘就生活開支、保險、旅行同埋現金儲蓄。
月供股票如下：領展$4k, 港鐵$4k, 長江基建$3k, 中電$3k, 煤氣$3k, 盈富$3k, 中銀香港$2k, 恆生銀行$2k, 新鴻基$3k,電能實業$3k。
另有3手大快活, 2手偉易達, 1手冠君產信託。
我想加速財富增值，想問下有冇可以改善的地方？
Thank you！
龔成老師：
你的財務情況不錯，最緊要是保持這個數，堅持進行。
現時所選的月供股，都是有質素的股，你保持月供就得，如果要組合更平衡風險，就增加盈富（2800）的金額。而現時持股，長線持有就得。
不過，上述股票都屬於平穩增值類別，由於當中缺少左潛力股，令組合潛力方面不強。比較好的做法，是加2隻潛力股，例如比亞迪（1211）、中生製藥（1177），每隻月供$3,000，以你的財政情況，相信是無問題的，能令你的組合有穩中求勝的作用。
記住，中短期股價不要理會，保持長期進行月供就得。
另外，如何運用餘下現金，是另一個影響你財富增長的因素，如果這刻現金不是過多，那就先持有現金先，同時，你要好好學習選股、企業估值、投資時機，只要這方面做得好，同時，你要耐心等大跌市出現時，才動用這些資金，對你財富影響會好大。
（對照龔成信箱：Q9258）
9.手續費
龔成老師，你好~
想請教下你有關月供股票問題。
因見坊間好多銀行月供個手續費都唔低，最低都要50/隻/月，如果每月供2、3千 個成本就起碼成2%，加上佢收存倉、股息手續費，咁分分鐘賺埋都冇乜肉食，仲要承擔埋佢有機會下跌風險。
所以想問老師你平時會用邊間來做月供? 或點供法個成本會低d?
龔成老師：
之前有聽過，南X商業銀行、匯X銀行做推廣果排，手續費加雜費好低，你可以多問下，多比較先決定。
如果費用佔了投資金額1%以上，其實已開始多，都幾影響回報。所以，如果資金較少，或者唔好心急月供住，儲多點錢先，當每月供款金額都有一定數，費用佔比就會相對較少。
我自己並沒有月供的。月供的好處是平均入市法，可以減少投資者一次過在高位買入的風險，但如果投資者本身有分析平貴的技巧，就可以自己決定幾時買入，而不用月供。
當然，我就算買入時，都會分注買入，不會一次過，因為要捉低位其實好難的，因此往往會以策略去平均。（對照龔成信箱：Q9259）
10.月供股票
月供股票咪只可以當儲蓄，分分鐘會蝕？
龔成老師：
投資股票一定會有賺蝕的。
月供股票的原理，就是不斷儲錢，但不是儲現金，而是儲股票，由於月供是以長期模式進行，所以我地唔需要理中短期的股價波動，睇長線就得。
由於買股票就是買企業，而優質企業長期的價值必然向上，所以，只要選對優質股就得。所以，只要選優質股，長期進行，就好難蝕。
如果未有選股的能力，就簡單月供盈富（2800）已經得。
（對照龔成信箱：Q9260）
