投資講呢啲？參與感與獲得感值3.5厘？︳凍鏈茶專欄
廣告
財赤之下，繼機管局、市建局後，政府又要四出發債撲水。本週公布向香港居民發行基礎建設零售債券，利率同本地通脹掛鈎，是次最低保證利率為3.5厘，每半年派息一次，入場費1萬元，發行額200億元。政府認為市場已經進入減息期，所以利率較9月時推出嘅銀債低0.75厘，較去年9月推出嘅綠債更低1.25厘。
呢個方案有幾貼市？港府官員知唔知特朗普當選美國總統後，刺激美債孳息率上升，現時2027年到期短期美國國債，孳息率有成4.29厘，部分銀行嘅3個月美元定期利率依然係4厘以上。加上，雖則美聯儲局話出年繼續減息，但步伐未必如預期般快減。最近公布美國就業數據反映美國經濟仍然強勁，市場對減息預期降溫，美國10年期債息更一度升穿4.5厘。政府發債，仲低過美債息口，你估小市民唔識計數咩？
財爺陳茂波可能都自知息率唔係咁吸引，竟然話發債可以令讓市民有更大「參與感」與「獲得感」。不過，相信都無咩人會因為「參與感」與「獲得感」而買債券，呢批債券，估計都可以氹吓街市班唔識買美債嘅師奶嘅。
而買債除咗要睇利息，大家都係求穩陣、求心安，但睇返政府上月底公佈，今個財政年度首六個月已發債超過248億元，但庫房仍有2,260億元赤字，都唔知未來要發幾多債先搞得掂？如果香港真係有班人因為「參與感」與「獲得感」而買呢批債，不如波叔索性拎佢哋筆錢來買美債，做個套戥，穩穩陣陣賺返嗰厘幾嘅息差，回報一班支持者就更顯財爺英明啦！
免責聲明：本專頁刊載的所有投資分析技巧，只可作參考用途。市場瞬息萬變，讀者在作出投資決定前理應審慎，並主動掌握市場最新狀況。若不幸招致任何損失，概與本刊及相關作者無關。而本集團旗下網站或社交平台的網誌內容及觀點，僅屬筆者個人意見，與新傳媒立場無關。本集團旗下網站對因上述人士張貼之資訊內容所帶來之損失或損害概不負責。
