年輕同事拒OT 企硬唔加40%就辭職 老海鮮：咁厚面皮趁火打劫
廣告
相信大部分打工仔放完聖誕假返來都準備面臨年尾Appraisal要求升職加薪及等出Bonus的時刻，但日前就有網民表示，原本打算下年晉升一位下屬，豈料對方竟拒絕OT，並要求加薪40%，否則辭職！
老海鮮：年青人價值觀錯晒
該網民在FB專頁「奴工處」發文，指自己「唔識同而家啲後生仔溝通，可能我已脫節，或者我唔明點解時下年青人啲價值觀可以錯晒。」
他續指，有一位20出頭的下屬，「做嘢好叻仔又有交帶，我一直睇好佢，下年都打算升佢」，而近日公司有幾個同事離職，部門不夠人手，近日各同事都工作到晚上8點多才離開公司，於是該網民便與這位下屬溝通，「我打算shift 返多啲duty 過去，叫佢拍硬檔幫手頂埋過年，因為仲未請到人」。
樓主：「佢話做多咗嘢叫我補償」
豈料，該同事竟然要求加薪40%，「因為佢話做多咗嘢叫我補償，仲要拎埋辭職信出嚟，講到明加唔到就會辭職，辭職後一個月都唔會再幫手OT」。
該網民概嘆「點解啲年青人可以咁厚面皮，價值觀錯晒，公司唔夠人手仲要坐地起價趁火打劫，唉，我真係脫節」。
網民：唔明點解唔直接辭職
帖文一出，隨即引來網民熱烈討論，絕大部分網民均一面倒支持年輕同事的做法，並指多勞多得很正常，打工並不需要講感情，直斥樓主真的是與時代脫節，不論年齡都難以與樓主溝通，樓主圍爐失敗！
- 「如果工作量多40%，要求加40%人工好合理吖。」
- 「我唔明個後生點解唔直接辭職。」
- 「年輕人是正確的，他做多幾個人的工作，而且你又認同他的工作能力，好值得加人工，好員工難搵，搵到就應該好好珍惜，老闆不會做虧本生意，為何要員工吃虧工作？」
- 「同公司有親咩，你叫佢拍硬檔個時，咁佢做到隻狗咁又邊個拍硬檔幫佢。」
- 「真係你脫節，脫到好離譜，現在90後真係好識計數，無70後咁不計較，佢哋覺得係打工，唔係公司奴隸，一個月超時加班無水補可以忍，長期累月邊個忍，忍忍下，就係佢做嘢。」
網民：個上司似係唔識管理
- 「餐廳食多碟野都要俾錢啦。」
- 「佢啱wor。我覺得佢先叻，做到野，又識為自己打算。係你退步咋。」
- 「以前都係咁架啦！間公司冇前景又冇錢景，咪走囉，出面大把世界，人地有本事，但你冇本事留人，就唔好阻人發達啦！」
- 「宜家做返正常人叫價值觀錯？條命自己既，又唔係公司。仲要公司又唔係佢既。」
- 「你有無同對方講會升佢？升又止唔止加40%？定係升完都加唔到40%？今年我加比part-time 都要加20%，你唔加仲諗住要人做多d，仲要頂埋過年，真係你做埋我份。做老細一向慘過打工，睇唔化咪執左佢，出黎打工好過。」
- 「個上司似係唔識管理，個同事做得，但乜reward都冇既話，咁點做落去先，開40%都係等你還價姐。」
網民：係人都同你溝通唔到
- 「佢又真係無錯，OT唔一定有補水，人地黎番工賺錢，唔係為左賣命。」
- 「多勞多得唔係正常嫁咩，一個人做幾個人野，唔係應該出返多幾個人嘅人工先啱咩。」
- 「一分耕耘一分收穫，打工同你講感情？依家唔係70，80年代，點解要一份工打成世。」
- 「乜嘢價值觀錯，要人做多啲嘢，比多啲錢，唔係好正常咩。」
- 「又要人做野，又要人地同你共渡時艱，但又唔肯加人工，都唔好講後唔後生仔啦，係人都同你溝通唔到啦！反省下啦，仲話人價值觀錯。」
- 「幫係人情，唔幫係道理，點解爭取自己應有既野就係價值觀錯哂？」
- 「都係打份工出份糧啫，做乜要幫你免費打工？ 你老seafood 唔會走係你既事，明知出面一跳糟就加多幾千，做咩要免費同你捱？反正後生仔適應力強，出面大把世界。」
- 「家陣係打工定做義工？公司有問題就叫人捱義氣共患難幫幫手，人地叫你加翻相應人工就即刻反枱，咁你覺得咁唔合理就放人走啦，你自己拎一份人工做十個人野啦，唔好再害人。」
免責聲明：本專頁刊載的所有投資分析技巧，只可作參考用途。市場瞬息萬變，讀者在作出投資決定前理應審慎，並主動掌握市場最新狀況。若不幸招致任何損失，概與本刊及相關作者無關。而本集團旗下網站或社交平台的網誌內容及觀點，僅屬筆者個人意見，與新傳媒立場無關。本集團旗下網站對因上述人士張貼之資訊內容所帶來之損失或損害概不負責。
圖片來源：unsplash@priscilladupreez
