80後月儲$1萬 除盈富外 可月供4隻平穩增值股｜龔成信箱｜經一專欄
1.平穩增值股
Hello 龔老師，我上年上過你股票班，獲益良多，多謝你中肯既分析。本人80後，持有以下股票:
1.港鐵 1000股
2.領展 1000股
3.長建 1000股
4.港燈 6000股
現金大約有20萬，你認為加注以上股票，還是另購入多一隻股票，使組合更完整？心水有新鴻基地產，中銀香港，銀誤，或比亞迪。另外我每月大概儲八千至一萬，除盈富外，你認為月供哪一至兩隻股票比較適合？多謝你耐心回答！
龔成老師：
你上述持有的都是有質素的股票，可長線持有，但你是80後，財富仍有一定的增長能力，收息股如港燈（2638）不用太多，原有的貨不持有，但不用增持這類別。你現時持有$20萬，可以用作投資股票，平穩增值類是適合的，盈富（2800）、港鐵（0066）、新地（0016）、中銀（2388）、金沙（1928），你都可以分注投資，只要不用盡資金就得。因為現時大市只處合理水平，未算平宜。
至於每月的$8,000，你可以將其中$6,000去做月供股票，一半供平穩增值股，金沙、中銀都可，另一半則供潛力股，例如比亞迪（1211），等你組合有增值的能力。你唔需要理中短期的股價，長期進行月供就得。
（對照龔成信箱：Q9028）
2.基金交易
老師，請問交易所場外的基金交易，其基金的每單位價格是怎樣釐定的？是否取決於基金資產淨值，不是取決於買賣供求？交易所場外的股票基金其資產淨值是否等於所投資股票的市價再減基金本身的負債？
龔成老師：
其實有不同的類型的，最簡單分類是開放式與封閉式，開放式基金價格，取決於資產淨值，例如該基金是一隻股票基金，就是當中股票的市價，扣除負債（如果有），加上現金，扣去手續費等，就是淨值。至於封閉式基金，則是看供求，當然，供求都會因應基金的資產淨值而有所改變。
（對照龔成信箱：Q9022）
3.萬洲國際（0288）
你好龔老師，0288我係5.5買入，但由於只買左一手，所以依加放的話收益唔大。現時呢隻股最高上過6.48，想請問下你認為我應該等到6.5放，定放長遠d，係價位回落時候入多d貨，之後收息好呢？
龔成老師：
我地投資，一定是建立一個長期的財富組合，組合中要持有優質股，除非股價已遠超合理價，又或企業質素轉差，否則可以一直持有都無問題。萬洲國際（0288），本質不錯的，但貿易因素會影響佢的業務，但長遠仍是有質素的。這股現時唔算貴，如果你唔怕中短期因素令佢波動的話，可以等再回少少再入，然後長期持有，這股股息都有4.5%，不錯的。
（對照龔成信箱：Q9023）
4.新天綠色（0956）
老師，想問問新天綠色能源及中國鐵塔現價可買入嗎？thx
龔成老師：
新天綠色（0956）質素中等，佢主要從事新能源同清潔能源的開發與利用，旗下擁有兩大業務板塊：風電業務和天然氣業務。質素不算強，主要由於賺錢能力不強，以及風電方面的不穩定性，以及負債風險，將會是這企業的風險因素。但這企業近年的增長理想，加上前景不差，同時營運效率正提高，都是當中的利好因素。所以，這股都可投資，有穩中求勝的作用，現時估值合理，可以小注投資。
至於中國鐵塔（0788），其實本質不差，只是上市時以較高估值上市，同埋佢這刻的盈利唔算好多，市場以「預期」去進行估值，當佢往後盈利有理想增長。這股都可投資，但最好就以分注的模式投資，耐心等收成。
（對照龔成信箱：Q9024）
5.中國飛機租賃（1848）
想問1848算唔算係一隻潛力股？應該分注收集嗎？
龔成老師：
中國飛機租賃（1848）有質素的，這股有長線投資價值，加上現時估值不高，有投資價值。但要留意，這企業的原理是利用高度借貸，然後將資金投資飛機，然後再出租收租，只要運作得好，可賺取理想的息差回報。不過，整個業務都建基於借貸模式的原理，而這難勉有風險，而市場對明白這點，所以會對這股的估值進行折讓，因此，現價不算特別平，只是一個合理的水平。分注投資可以，但總投資金額不要太多。
（對照龔成信箱：Q9025）
6.玖龍紙業（2689）
Hello 阿Sir, 2689玖龍紙業你點睇呢間公司的價值呢？你呢隻係咪一隻有潛力的股票？thanks !
龔成老師：
所有野都是由學習開始，無人一開始會識，我18歲投資股票，都是由零，一步步，再有今日的成績，所以只要你保持學習，你都做到！玖龍紙業（2689）業務其實不差，但就有少少波動情況，因為佢受到成本及紙價等因素影響，令佢處於一個較為被動的狀態，雖然佢這刻市盈率好似好低，但由於佢盈利坒早兩年增加左好多，而由於佢企業的盈利保障程度唔算高，所以盈利之後跌翻落去是可能的。
所以，現時處合理水平，但潛力就只屬中等。至於佢的資產質素，其實都改善中，因為以前佢的負債好高，現時已去到較為合理的水平。整體都算正面，都有投資價值，但就未必預佢潛力好勁。
（對照龔成信箱：Q9026）
7.房託
龔先生您好。 如果想揀一隻REIT去供, 打算作收息用, 因為見呢類股票價位相對穩定。 如果陽光(0435)和置富(0778),你覺得哪隻較好？聽講置富的物業比較民生少少, 所以相比之下會較為優質。但我一路都只留意陽光。(目前有極少量陽光在手,入場價為接近52週低位, 4.67) 還是你有更好的推介? 領展(823)入場費太高, 只能作為月供。
我希望在投資增長股同時,都俾自己一條後路, 有另一筆穩定的利息收入而又不致於賺息蝕價,所以REITS會係我收息組合中的一部份。另有港鐵(0066), 建行(對建行相對較失望,短期跌了很多, 不過始終覺得有質素而派息較高, 最多當佢係收息股就算), 另有煤氣(0003). 這幾隻會相對有質素。
除建行外(因為目前手數已經佔我股票組合大部份,不想集中同一類股份, 加上近來經濟不不穩, 再加中央想支持民企的政策, 導致內銀股的風險偏高。) , 其他會逐漸以月供/趁低吸納的方式草貨。另一個係比較高風險的半新股, 美團點評(3690), 只持少量貨, 股價一路跌, 但我同時留意到佢外賣相關的業務有增長, 而我持貨量不多, 所以打算長放睇定D先, 佢起碼要2019年尾先有機會有利潤。唔知你點睇3690呢? (P.S 盈富2800會以月供方式吸納)麻煩幫忙分析下你高見, 謝謝你
龔成老師：
房託是很好的收息工具，因為原理就是「買樓收租」，所以股息穩定及平穩上升。陽光（0435）同置富（0778）都是有質素的房託，陽光持有寫字樓同商場，而置富則持有商場，相對地，置富所持有的物業，的確是較為民生的。陽光有質素，你長線持有無問題，至於同時買入置富，可以的，因為這是較為穩定的房託，民生類別較少受經濟週期影響。
領展（0823）現價則唔平，月供是較好的方法。至於港鐵（0066）—現價合理，可分注投資。建行（0939）則唔好對股價有太大期望，但佢是很好的收息股。煤氣（0003）優質，但有少少貴，月供可以。另外，我地唔會太著重中短期股價波動，你應著重長期的組合配置。我對新股、半新股，一向都有保留。
美團點評（3690）做得好大，業務強，增長快，但處燒銀紙的狀態，同時現時估值十分高，投資這類股的風險較高。唔係話佢無潛力，但如果估值過高，風險都會較高，所以，小注投資好了。
（對照龔成信箱：Q9027）
8.現金流
老師你好，想你可以比d寶貴既意見。本人33，有資產1000萬(計埋自住樓)，可變現金投資約700萬，因現收租同支出剛剛breakeven，但想盡快製造足夠現金流(＞15k/month)過自由點半退休生活。如沽樓換股你提議嗎？但想維持資產跟通漲增長，如沽樓是否太冒險因股票較波動？謝謝
龔成老師：
你從財富配置的角度去分析，相信會更明白自己現時的情況，以及點樣分配。我地最重要，是持有「資產項」，無論是物業、優質股，只要是資產就可以，同時，要建立一個平衡分配的組合。如果你持有3層物業，我會建議你賣出一層，然後將資金轉投資其他項目。但如果你持有1或2層，那持有物業較好。雖然這有點集中在物業類別，造成風險，但香港的比較特別。
第一，這刻雖然投資價值唔算高，但自住價值仍在，因為長遠的物業供應仍不足，所以長線持有是較好的。另外，物業的買賣成本高，除非好確認物業會跌，否則賣出不是好策略，持有資產長期進行就得。因此，雖然在配置上，你賣出物業，轉為收息股，會有較大的現金流，但在現階段，我又唔太鼓勵，所以這刻還是不要變動住。所以，與其賣出物業，不如加按物業，利用現金去投資更好。但這刻進入加息週期，不用心急去做，你可以等投資市場有明顯下跌，同時加息期穩定，才進行這一步，對你創富同減低風險是最好的。
（對照龔成信箱：Q9029）
9.銀娛（0027）
你好成哥，我係股票班學生，我早幾個月上完你堂開始試下估值銀河同中銀香港，中銀香港比合理區域低，所以我有入市，但市價岩岩好比合理區低部低少少，咁樣應該掃貨定分批買入？但銀河我預計合理區為 38-54， 我而家見住佢由42 升到49.6，我明白合理區內應該分批入注，但係我想請問我的估值合理嗎？而家仍然可以分注買入？
龔成老師：
因為你與企業估值也是近期個月的事，所以未必能完全掌握，仍要多作練習。所以，你估出的數，未必是完全準確，要有少少風險上的調整，咁樣會較好。中銀香港（2388）是有質素的股票，早前有較大的回落，但仍未到平宜區，暫時仍處合理區的位置，最多只是合理區中下部。所以，這股你可以分注投資，但就不能訓身。
至於銀娛（0027），你估的數則較為接近企業價值，而現時可以話處合理水平，因此可以分注投資。但要留意，我地進行企業估值時，要分析佢的「盈利」，這個將會影響到佢的企業價值，要進行預測、推算，要考慮佢最新的情況。
（對照龔成信箱：Q9030）
10.港鐵（0066）
你好 龔成先生，想睇下港鐵你覺得現價ok嗎？For 3-5年投資
龔成老師：
港鐵（0066）是優質股，有投資價值，佢最近受不利事件影響，而令佢的股價有所回落，但作企業核心的角度分析，本質基本無變過，投資價值仍在。現時處於合理水平，可以投資，持有3年以上無問題的。（對照龔成信箱：Q9031）
