【經一專欄】80後夫妻月儲$10K 用其中$5,000買平穩增值股｜龔成信箱

撰文：龔成｜圖片：新傳媒資料庫、unsplash

1.平穩增值股

龔sir，一路有睇開你的理財觀念
都好認同並且學習當中

以下提問：

我地冇咩現金，目前財政如下、本人收入約2萬，兼職收入再多2-4千

太太暫時係主婦，會做點代購收入5-8千不等
今月扣除所有支出
可儲1萬左右 這情況算健康嗎？（沒有貸款）

持有：
358 6000股11蚊
1088 8000股 19.5蚊
388 400股250蚊
700 100股400蚊
以上持貨價格是否買貴了？

另外我地重打算要小朋友
（雖然現住套房、但我地都決定繼續努力）財政上有咩指點？

Mpf我在hsi 30700左右時由現金全數轉了恆指基金，供款也是，可以保持現狀供控下去嗎？

每月儲10000來說
我要月供股票應該怎分配現金同股票供款？

多謝老師！
Ps：我以33歲、得知以經錯過黃金十年，後悔不已！
請老師指點迷津

龔成老師：

你地現時的財政情況，都算不差，起碼叫做健康。

住套房是很好的儲錢時期，如果你打算有小朋友，這刻應利用住套房，租金相對不算高的狀態下，努力儲錢，之後才慢慢改善生活。

雖然過往錯過了時間，但只要這刻努力直追，其實已經好唔錯。

如果你短期內打算生小朋友，就要多儲現金，如果2、3年後先打算生，就可以在每月儲$10000的部分中，用$5000去做月供股票，等你有基本的財富增值。最簡單就是供平穩增值股，即是盈富（2800）這類，長期進行就得。

在這段生小朋友之前的時期，辛苦少少，努力少少，儲多點錢，增加財富，之後條路會順D。

至於現時的持股，雖然買入價略貴，但由於是優質股，所以無問題，長期持有就得。

至於強積強，其實一次過將現金轉股票是有風險的，原理同一次過買股票一樣，所以應該慢慢轉的。不過唔緊要，這刻已轉左，就繼繼持有，反正你年輕，無問題。之後的每月供款，可以繼續供恆指，長期進行就得。

建議你多努力提升財務知識，睇書上堂都好重要。

（對照龔成信箱：Q8554）

2.比亞迪（1211）

成哥，最近有個問題好困擾我，因我用來投資既本錢有一大部分已投入股票，雖然唔係高位入，但現在好多優質股下跌我都無現金加注，因為我趕唔切係高位減持。

依家如果賣晒佢，會係岩岩好拎得返上年開始投資既本金，無賺無蝕（其實即係蝕左機會成本），但如果我賣左一部份蝕緊既優質股，可以用來買一些明顯估值吸引既股票，我應該咁樣做嗎？

我好想套現來買金沙同銀娛同港交所，我打算賣陽光（平均$5買），深高速（平均$7買），廣汽（平均$9買），比亞迪（平均$50買），今日我已經賣左中電（$79買）。

雖然錯過左中電9x既時候賣，但我想趁仲有賺既情況下賣左佢用來買更好既股，你同意嗎？

因為我記得價值投資其中一個賣出既原因係有更好既投資目標，我想趁金沙銀娛港交所現價好平既時候買入！我相信依家蝕既價將來呢兩隻股既升幅會追得返

本來應該係愈跌愈唔應該賣的，但奈何我有筆現金想準備用來入市買樓（因有置業需要同埋最近樓價開始回落），所以我只可以用我現有既股票黎套現再轉倉，你可唔可以俾左建議我，應該點樣做先最圓滑？

龔成老師：

我地投資，一定要以長線的角度分析，雖然你一年的投資打回原形，但唔代表當中有問題，你要以企業的本質去分析，睇翻長遠的配置有無問題，唔好比中短期因素影響。

如果要賣出股票，去轉其他優質股，要有明顯的平貴差距先值得，否則，好多時唔轉好過轉，只要你本身持有的是優質股就可以了。

我地最重要，是建立長遠的財富配置，你現時持有的股票，其實都有質素，你要思考翻當時點解買入，如果到這刻買入的現由仍在，仍優質，那就不用賣出。

我地唔會因為股價上落而改變配置，因為這是一個長期的過程。

我原則上唔太建議轉來轉去，但如果你想用資金買其他優質股，咁可以賣現時持有股的一部分，但唔好賣比亞迪（1211）。

另外，強烈建議你學企業估值，你整個投資概念會唔同晒，對你長遠財富的影響會好大。因為你唔知點做最大的原因，是因為唔知現時每一隻股，是平是貴，而平貴同高低與跌得多與少是無關的。

（對照龔成信箱：Q8550）

3.掃貨

想問龔SIR, 點睇1928 @$30, 約6.5厘息, 左右, 是否已到便宜區, 可以掃貨?? 但本人已經月供此1928 股票了

龔成老師：

金沙（1928）在$3X是合理區，根據我之前在課堂上的計算，大約落到$28以下就進入平宜區，到時先至係掃貨，如果在$3X，當然都可以買入，因為佢優質，只要分注投資就無問題。

你這刻保持月供就得，如果落到$28以下先再用其他資金買入。

（對照龔成信箱：Q8551）

4.股市週期

龔sir, 現時很多新聞，分析都比較看淡，請問現時係處股市週期的較低部嗎？有沒有一些指標如成交量可參考？

謝謝！

龔成老師：

出面好多人都會對大市作出預測、分析，話之後的走勢係點，但你睇翻呢啲所謂「專家」，佢的財富根本唔係憑投資賺到的。

相反，憑投資賺到幾千億的巴菲特，佢話無人能預測到之後的股市走勢。

所以，我唔知之後點走，但我地可以分析這刻的平貴，以及冷熱水平，去作投資策略。恆指如果去到23000-24000，市盈率大約是10倍，可以初步確認進入平宜區。

（對照龔成信箱：Q8552）

5.港燈（2638）

龔成老師，本人剛在銀行做$300萬按揭，RM話若我把剩余儲蓄$1.5M放在戶口, 可以享有同按揭一樣的利息。而且每月入銀行。變相只需比一半按揭利息。這個優惠好嗎？

還是用$1.5M買一些收息股？
若買收息股可以買什麼呢？謝謝！

龔成老師：

這類戶口有用的，可以將你多出來的資金，存在這裡，有效抵消按息，所以可以有效善用。

至於是否將資金投入收息股，則要睇你的風險承受能力，因為你現時的總負債增加左，即是部分資金始終是借來的，宜投資風險較低的項目。

如果你年齡不算大，可承受到少少風險，咁樣就可以將部分資金，用來投資收入股。例如可將$70萬，分注投資收息股，買不同的收息股，建立組合，目標是港燈（2638）、置富（0778）、工行（1398）、合和公路（0737）、香港電訊（6823）等，都是有5%以上的股息，咁樣已比你單存在高戶口有更高息，同時能賺取息差回報。

（對照龔成信箱：Q8553）

6.優質股

龔成先生 你好！

請問1177和1093前景如何？
他們現在是否處於偏貴既水平？

可以繼續持有嗎？投資他們應采取什麼策略？
謝謝

龔成老師：

中國生物製藥（1177）同石藥集團（1093）都是優質股，無論行業與自身的增長力都不錯，賺錢能力高，前景正面。

但市場對醫藥股之前有熱炒情況，之前處貴水平，近期股價回翻D，現價算是在合理區較上部，都可以分注投資，但就未到平宜區。

如果你有貨，當然可以繼續持有，長線投資。但醫藥股有本質的業務風險，不應過您集中在這兩股。

（對照龔成信箱：Q8555）

7.盈富（2800）

你好，我下年打算增加月供
現月供2800同939各2000
現考慮將會月供3 66 823

三簡一或者二
若增加後
應否將2800變左月供1000
把金額轉作月供其他股票？

2800好似佔計劃太多
我平均買入價30
現價卻跌左

龔成老師：

我反而建議盈富（2800）保持金額，不用特別減持，因為這本身是一個50隻股票的組合，當中的質素不差，同時持有50隻有分散風險的作用，持有盈富對你整體組合較好。

股市中短期總有上落，就算你之後不是供盈富，而是供其他股，你都一會有賬面上的損失，所以，唔能夠話盈富賬面上損失就代表佢有問題。

而月供股票一定要L睇長期，唔好比中短期股市影響左。你要以「長期建立資產」去想。

如果你想將資金供其他股，可減少月供建行（0939）至$1000，然後將$1000供港鐵（0066），盈富就照供$2000。

（對照龔成信箱：Q8556）

8.潛力股

老師你好，請問你對751創維數碼有咩意見？是否可考慮為潛力股？

龔成老師：

創維數碼（0751）質素中等，業務唔係無錢賺，但生意無增長，同時毛利率有下跌情況。

電視產品、數字機頂盒、白家電銷售都是佢的其中產品，在中國有一定的品牌。

佢係2009年度後盈利快速增長，當時由於中國在金融海嘯後，推出了家電下鄉等刺激經濟措施，而行業受惠於其中政策而快速增長，到2013年節能補貼政策完左，佢就開始放緩。

到左近年，其實已經平穩，但增長力唔大，而市場競爭又多左，賺錢能力減弱，見佢股本回報率不足10%。

整體來講，質素中等，但市場現時估值不貴，都是吸引之處。這類股小注可考慮。

（對照龔成信箱：Q8557）

9.收息股

龔sir 你好!!之前你咪有段片講話每月供6000蚊盈富, 20年後有大約730萬。跟住再分配去收息股以產生每月30000現金流(以年回報5%計算)。

我想問如果唔將6000蚊供晒盈富, 加埋其餘兩隻e.g. 港鐵, 銀誤, 每隻供2000。咁供20年後會唔會有相約效果?

現在市況波動, 我有聽你建議: 邊月供邊儲現金, 等待時機。祝安康!

龔成老師：

我先講講之前條片的原理。當中運用「先增值，後現金流」作方法，年輕人應投資較多增值類資產，而較年長的，則應投資較多保守類項目，因為年輕人的財富系統未成形，同時負擔較少，可承受的風險度較高，所以會著重增值為先。

當中假設投資盈富基金（2800），利用月供模式都得。跟據過往恆指40年的數據，連股息的複息回報有15%。

假設你每月投資$6000，月供盈富，假設15%複息回報，20年後，就可以滾存到$730萬。

當然，無人知之後的盈富能否好象過往40年般，有15%複息增長，因為中港經濟比過往減慢，可能最終只得10%-12%。

其實，你選擇供港鐵（0066）、銀娛（0027）、盈富，各$2000，這樣的組合都可以，這兩股都有增長的能力，但最終能否取得每年15%的回報，其實無人知，但你都可以咁做。

同埋，邊月供邊儲現金是重要的，我地無人知之後股市的升跌，這個策略其實最平衡。

（對照龔成信箱：Q8558）

10.中生制藥（1177）

龔sir，今次想問：

我有兩手1177，請問格價合適嗎？你點睇1177？見佢愈來愈多patent的藥物，似乎搞得有聲有色！

另外，在恆指到達幾多點時，先係入市掃貨好時機？

期望有一天能上到你的堂。現在工作很困身，晚上時都要工作，而早上到晏就都有時間，但你沒有早午堂。

龔成老師：

中生制藥（1177）是有質素，有潛力的股票，可以長線投資，但最大的問題是估值，之前熱炒，其後回落，你買入是合理區，但仍不算平。相信佢股價仍會波動，所以唔好理中短期股價，耐心持有就得。

恆指在23000-24000，市盈率就大約是10倍，初步可以確定進入平宜區，就可以動用之前留下的現金，買平貨。當然，無人知恆指會唔會跌落去的。

你盡量夾時間啦，有時我都會開星期六下午班的，你可留意。

（對照龔成信箱：Q8559）