30歲情侶月賺$4萬有意上車 穩陣投資靠平穩增值股｜龔成信箱｜經一專欄
1.平穩增值股
你好, 我同另一半都30歲,將結婚, 當結婚完後重新儲蓄。2人月賺4萬蚊, 估計幾耐可以買到500萬的樓, 同求投資心得, 謝謝!
龔成老師：
要睇你地的儲蓄率先得，如果你地幾年內未有小朋友，建議盡力在這段時間儲蓄，否則之後就好難。如果每月可以儲到合共$20000的話，一年儲到本金$24萬，3年本金連投資增值，預計會有$100萬。已經可以作為買樓的首期。
至於這幾年的本金，只需投資平穩增值類股票，不要太過進取，因為投資的時間不算長，最簡單的是月供盈富（2800）。能助你的財富平穩增值。如果可以的話，努力學選股、企業估值、投資時機這些技巧，能助財富有更明顯的增值。
（對照龔成信箱：Q9100）
2.凱普松國際（0469）
請問凱普松國際(469)的質素如何？
謝謝老師
龔成老師：
凱普松國際（0469）係一間垂直整合的鋁質電解電容器製造商。其實佢的收入都穩定，但由於成本價格的波動，令佢盈利變動好大，之前更出現虧損，企業賺錢能力不高，質素不算高。雖然最近出的業續有盈利，但由於本質有不確定，而盈利又不算明顯，因此投資價值不高。
（對照龔成信箱：Q9073）
3.瑞聲科技（2018）
老師你好，有股票問題想請教一下，現時持有瑞聲科技8000股，平均價59.4，跌左19%，佔現時股票組合40%，其他都係穩陣收息股，請問應否止蝕？謝謝。如止蝕 打算放落其他公用股或盈富基金
龔成老師：
瑞聲科技（2018）本身有質素的，雖然你買價比現價高，但當時都唔算太貴，這股有得守的，唔洗太擔心，不過，行業仍處較弱期，你要預中短期仍會波動，長期先慢慢升翻。另外，不要增持這股。
你現時這股佔4成，其實有點多，因為單一股票去到2、3成已有點盡，如果你想平衡風險，可以賣出部分，若然你本身是風險承受能力較高的人，4成都可以勉強持有的。如果賣出了部分，就可以將資金投資在盈富基金（2800）。
（對照龔成信箱：Q9074）
4.慕容控股（1575）
老師，我想請教
1. 我想問1575 呢隻股前景可以嗎?
2.另外我想問如果我如果我想向銀行借50萬買低風險既收息股，是否一個好既選擇？以上甘既情況可以選擇邊隻收息股？
龔成老師：
1）慕容控股（1575）這股的風險都幾高，企業規模細，加上上市不久，雖然上市前的數據不差，但往往這類股過一兩年先會「見真章」。從財務數據睇，唔算差，業務方面，佢透過ＯＥＭ（原設備生產）、ＯＤＭ（原設計生產）及ＯＢＭ（原品牌生產）業務模式設計、生產及銷售各種沙發、沙發套及其他家具產品，主要客戶包括美國大型家具零售連鎖店及零售倉儲俱樂部。
由於企業規模唔大，當外圍出現不利事件，中美因素，都會對佢有好大的打擊，所以風險會較高。我只可以話，這類股不易分析，如你想投資，小注好了。
2）借貸投資的確是一個創富方法，但都要睇時機。現時的股市只處合理水平，雖然你投資收息股，收到的股息都可以大於借貸利息，但有機會出現「賺息蝕價」的情況，因為這刻的股價只是合理，未算平宜。
就一般的資金投資收息股，當然無問題，但如果以借貸模式去投資，就有可能有風險。除非股市明顯下跌，令股價進入平宜區，咁就有一定的值博率。
（對照龔成信箱：Q9075）
5.中國通號（3969）
老師請問你點睇3969呢隻股票？佢又算唔算係潛力股？我見佢呢幾年盈利都持續上升而且亦承接一d國家既工程，前景好似幾好，你又點睇？
龔成老師：
中國通號（3969）主要係中國從事提供一站式軌道交通控制系統解決方案，例如為軌道交通控制系統項目提供工程設計，以及一些系統集成等服務。佢生意同盈利都保持增長，企業本質不錯的，只是負債近年有上升的情況，負債比率較高，這方面令企業風險提高左。基本都是正面的，但就有少少風險，若投資就不能太大注。
（對照龔成信箱：Q9076）
6.比亞迪（1211）
您好成功先生！一直keep住睇你個page，真係好多謝你的分享！我2018年一月開始月供股票，本身只供每月$2000 盈富基金(2800)，現在有多少少錢可以增加月供，請問我供多$2000 比亞迪(1211)同$1000 媒氣 (0003) 咁樣好嗎？
另外，我對銀娛 (0027)都好有興趣，想儲夠錢買一手，但佢一手現在都要成5萬左右, 對我來講係大數目…不過佢現在又好似跌左唔少。請問值得買入嗎？合理價大概是多少？想問多一問，現在比亞迪(1211)叫做有巴菲特加持，萬一巴菲特突然減持，係咪會令到股價大跌？因為好多人都因為佢而放心買…
龔成老師：
月供股票方面，可以加上比亞迪（1211）同煤氣（0003），金額方面亦無問題，你可以進行月供。至於銀娛（0027），這股值得入的$3X-$4X都算是合理價，但由於賭業同經濟的敏感度較高，你預佢可能股價較波動。這股可投資，你儲夠一手資金可入。
巴菲特持有的比亞迪股數，一直無變，佢亦去過去比亞的廠考察過幾日，表示這企業相當好，相信會永遠持有。如果佢真的賣出，要睇到時的原因，有可能令股價受壓的，但暫時睇，賣出的可能性極低。
（對照龔成信箱：Q9077）
7.舜宇光學科技（2382）
成哥，請問而家2382算係平價位嗎，中美貿易戰假如和好後會有機會爆上空間嗎？此股現價係可買入長期持有既時候嗎？
龔成老師：
舜宇光學科技（2382）有一定的質素，佢在技術的層面不差，同時有一定的大客都與佢長期合作。但之前估值處貴水平，加上手機行業轉弱，都令佢股價受壓。現時這股仍未到平宜區，只是合理。如果貿易利好當然對佢有利，但在手機行業轉弱的前提下，不要有過大的期望。這股可以分注投資，但要有耐性先有收成。
（對照龔成信箱：Q9078）
8.澳博（0880）
龔成老師，我知你鐘情金沙中國(1928)，因其中場業務穩定和息率高，但我想問澳博(880)是不是不可以小注買入?因見其息率也有3.16%，下年上葡京酒店項目開張，算不算有潛力(為其因本身中場市佔率下降提升番)，另外， 澳博(880)旗下有些賭牌(俾左美高梅中國(2282)，新濠國際(200)，澳門勵駿(1680)，是不是在續牌前景籌碼上勝算高D，謝解答！！
龔成老師：
澳博（0880）都有質素的，但如果我地比較幾間澳門博彩企業，在市佔率，過往發展，持有資產，股本回報率等更整體的指標去分析，會見到金沙（1928）、銀娛（0027）比較弱。當然，澳博接下來的項目，有潛力的，因此佢長遠都正面，都有投資價值。
至於賭牌方面，如果你有留意澳門政府近年的施政報告，就會見到澳門政府好強調「旅遊」方面，而不是賭博方面。賭是好賺，這點澳門政府都知，但佢想在賭的同時，能加大周邊旅遊的配套，而這會是將來賭牌，重要的考慮因素。而金沙同銀娛在這方面最強，所以好穩陣。
（對照龔成信箱：Q9079）
9.DYNAM JAPAN（6889）
龔成老師，想問Dynam Japan(6889)此股值得買入嗎? 因見其派息率高
龔成老題：
DYNAM JAPAN（6889）的核心業務為經營日式彈珠機遊戲館，為顧客提供體驗日式彈珠機及日式角子機兩種遊戲的場所，並以連鎖店模式經營，分店遍布日本各地。DYNAM JAPAN 是行業內最大型的日式彈珠機遊戲館，本身有一定的質素。這企業的股息回報都算穩定，但若然日後發展賭場，就要加大資本開支，有可能會影響派息，所以都會略有風險。
見佢近年的生意無增長，盈利亦有下跌情況，業務本質只屬中等，唯一吸引的，就是好穩定的派息，股息率高，所以收息可以，但不要對股價有太大期望。可投資，但不要太大注。
（對照龔成信箱：Q9082）
10.內險股
成哥認為如果就內險股比較，投資平保是否比起中人壽值博率更高？
龔成老師：
對，平安（2318）現時的企業質素，的確比中國人壽（2628）好，長遠前景都是。而我地投資企業，會偏向選強者的，所以雖然平安的估值唔算平，但如果從投資值博率的角度考慮，會較佳的。
（對照龔成信箱：Q9083）
