亂市嚟搞全新商業王國 希慎落錯注？｜凍鏈茶專欄

話說小弟當晚去銅鑼灣諗住感受夜生活，點知未到九點，條街已經人影都唔多隻。鋪頭一早閂晒，昔日嘅人山人海不復見。相信感受最深嘅一定係銅鑼灣大地主希慎(0014.HK)，可謂有苦自己知。

希慎今年一月正式通關前已經磨拳擦掌，買咗銅鑼灣加路連山道地皮，仲計劃將部份商場升級，打造一個全新商業王國。不過，睇返佢份新鮮滾熱辣嘅中期業續，希慎由今年一月至六月營業額16億，對比去年同期大跌一成。呢個通關之後嘅成績表，相比2021年新冠封城期間嘅18億仲少咗2億。當中跌得最甘嘅固之然係住宅，業績報告話唔只租金要減，出租率仲跌到得六成。而商鋪同寫字樓收入就分別跌7.5％同9.9％。