加息貿易戰未解決 空倉等大市跌完入貨 | 龔成信箱
撰文：龔成 ｜圖片：新傳媒資料庫
1.大市跌完再入貨
老師，我而家無貨，等大市大跌後才入貨，可以嗎？
龔成老師：
其實最大的問題，是無人知後市會升定跌，只能說現在有少少貴。我會建議現時分注入小小，慢慢買入，只要時間分得好，買入價就能平均，現時略貴的問題都解決。
而你等下跌的方法，不是不可，但都有風險，如果大市一直不跌，一直向上，又或保持現時價位，你就會損失了資金的機會成本。
太多人估個市之後會點走，但根本無人能正確估到。
2.停牌公司復牌
老師，460四環，2015因為被懷疑造假數，証監停牌一段時間，而且容許有條件復牌。2015至今有好轉跡象，現金多 ，每季派息，不論賺或虧，市值高。
你認為佢還沒有升上來，還是2015事件的陰霾嗎？
龔成老師：
曾經長期停牌的公司，一般我都不看好。四環（0460）過往賬目有問題，之後「改過」服牌，其實我仍是擔心的。
佢係咪真的「改過自新」，無人知，但有d公司，其實只會造得好睇d，做得小心d，合符大家的要求。我唔知四環會點，但我會避開這類公司。
3.MFP一問
老師你好，我27歲，有事請教！
1) MPF有50%係盈富基金，其餘全部歐美+亞洲+大中華股票基金……我應該轉做全盈富基金嗎？
2) 賣左25錢黃金存摺@恒生，同賣左7手ibond，再補左d錢，轉買2手中銀香港@每股$35、12手合和公路@每股$4.6、2手越秀房託@每股$5.15、5手南方A50@每股$15、2手眾安保險@每股$75……
你覺得當中有無唔適合既地方？如果再有多OT錢，我打算一手一手咁入越秀房託，先增加自己既現金流，依個做法正確嗎？
3) 剛剛係中銀整多份月供股票，暫時預算每月$1500左右，我見0003中華煤氣年年10送1，近幾年如果計埋息回報率好似有多過10%，應該幾適合我依類平日唔得閒睇市既人？
龔成老師：
1）唔洗轉來轉去，你的組合已經平衡，其實都無問題的，轉來轉去有機會令你在高位時買貴貨，強積金是長期投資，好耐先轉一次都得。
2）可以的，除了眾安（6060）我不懂分析外，其他都無問題。
持續買入越秀房產（0405）都算可以的，但在現時市況，最好以「一邊入貨，一邊儲現金」作策略。同埋，年輕人其實可多點增值類的資產，收息股可以只佔較少部分，因為我地應以「先增值，後現金流」作人生財富的分配，所以，這刻收息股其實不用佔你太多。
3）煤氣（0003）可以的，做月供是正確的策略，因為這股經常處於略貴的水平，月供模式可以將價格有效平均。
（其實，以我過往做銀行觀察客戶的經驗，成日睇住個市果d人，都是蝕最多的一群）
4.科技股受打擊
請問2018點睇？
我156.5入。現在點算好？
龔成老師：
瑞聲科技（2018）正面的，不用太擔心。這企業有技術，近年生意同盈利都有唔錯的增長，長遠發展仍正面。
只是之前的估值過高，要慢慢才會升得翻上去，因為就算現時的估值，其實乜不平，所以，現時只有持有住先，這股有得守，但就要少少耐性。
5.港燈入場時機
老師請問2638港燈ss,現時，咩價位入最理想
龔成老師：
港燈（2638）一年股息約$0.4。
6%的股息率我會認為有吸引力，即是大約$6.7這個價位，但要佢跌落去這個價位唔易，所以現價可以用分注買入的策略進行，因為現價都不算貴。
6.中移動追落後
成哥，現在我手持中移動941,中海外688及港交所388
比較睇好941追落後 所以想繼續持有..而688及388我覺得有點過熱..你覺得應該先沽出嗎？謝謝
龔成老師：
中國移動（0941）長遠正面的，但相信中短期的表現只屬一般，因為遲些5G的資本開支都幾大，這會影響企業的現金流，同時影響派息。
中國海外發展（0688）同港交所（0388）都有點熱，前者可考慮賣出，但港交所，本身優質，雖然現在不是買入的時候，但持有是較好的策略，因為大市仍未到全面的狂熱期，若到更熱時，佢的股價會升得更多的。
7.港股爆未？
你好！成哥！現在股市氣氛很刺熱，你認為去到爆煲的階段，保守估計恒指應該會去到咩位會掉頭行？
龔成老師：
無人知幾時會掉頭，只能說，當市況愈狂熱，就愈偏離合理價值，基於「價格總會回歸價值」的原理，偏離得愈勁，跌的可能愈大，到時亦跌得好勁。
恆指在33000，市盈率約17倍，但企業的盈利增加，會令市盈率下跌至15倍、16倍，這水平，又唔算太貴，未見到嚴重地偏離價值。
8.借錢投資
龔成老師: 我同銀行貸左款，合共有35萬。考慮all in增長股，買一兩隻，好嗎？
龔成老師：
你的行為，有相當高的風險。借錢創富不是不可，但卻是在「有明顯機會時」才出手，借錢買資產如同一張皇牌，這張牌不能隨時用，要等有一個「十拿九穩」，你心知必贏的情況，才會出牌。這張牌可以在恆指20000點時出，但就不是30000點出。
我地投資講配置，你太過集中一兩隻股，風險更高。
9.持有停牌股
你好，想問下2468，我持有好耐仲停牌中？
係未無機會復牌？
龔成老師：
佢已經停牌好耐了，暫時睇仍然唔樂觀，你而家無野可以做，只有等待。
10.月供組合一問
老師，我如果月供3隻，每隻$2000-$3000，會唔會太少錢 （太散）？除左2800同1211，你會建議我月供邊隻？有無邊D係現價唔算太高又有高潛力呢？
如果2601同2628比較，你認為邊隻更值得持有？
另外，中資銀行潛力如何？建行/中行/工行你睇好邊隻？
你寫過咁多本書，會建議我睇邊本呢？
龔成老師：
月供3隻可以的，如再供多隻，中銀（2388）、金沙（1928）、長建（1038）、領展（0823）都可考慮吉如要在中國太保（2601）同中人壽（2628）之間選，我會偏向中人壽。
內銀股可以考慮工行（1398）及建行（0939），質素較好。但內銀的潛力不高，收息可以。
如果初學股票，可選《50穩健收息股》。
體驗1分鐘貸款批核 隨時提款話咁易
平遊東京不是夢！最平住宿喺晒呢度！
編按：龔成是於公屋長大的80後青年，畢業後於銀行從事投資相關工作，雖然月薪僅萬多元，但因為理財及投資有道，只花五年時間，於28歲已累積到100萬元資產，目前淨流動資產有數百萬元。著有暢銷書《80後百萬富翁》、《80後2百萬富翁》及《財務自由行》，並出任創富課程導師。
facebook專頁：facebook.com/80shing
個人網站：80shing.skx io
