阿爺唔順超 誠哥大陸碼頭凍過水︳凍鏈茶專欄
廣告
上星期，當大家都以為誠哥單千億大刁實食無黐牙，點知有嘢始終都避不過。香港大公報近日接連發文質疑長和(0001.HK)此舉是「唯利是圖，漠視國家利益、民族大義」，「背叛和出賣中國人」，而港澳辦、中聯辦連續兩次轉載呢啲文章，建制風向齊聲「焗」誠哥三思。令長和出售巴拿馬運河兩端港口等資產或多或少出現「不可抗力」嘅變數。
或者喺誠哥甚至好多人眼中，港口只係一盤生意，不過對中美政府嚟講似乎就有好多政治上嘅考量。除咗巴拿馬，仲有大家熟悉嘅香港葵青及內河碼頭。長和旗下喺新加坡上市嘅和記港口信託（SGX：NS8U）主要收入嚟自中、港。中國內地就有8個：包括和記港口鹽田國際、惠州港、江門國際貨櫃碼頭、南海國際貨櫃碼頭、寧波北崙國際集裝箱碼頭、上海明東集裝箱碼頭、上海浦東國際集裝箱碼頭，以及廈門國際貨櫃碼頭，大部份都係同國企合資。
事實上，經營港口本來係有錢途。深圳鹽田港和惠州港嘅吞吐量去年上升10.97%至1,520.3萬個標準箱。就算喺中美貿易戰之下，長和港口舊年下半年業績仍然非常強勁，收入按年升近15%至62.5億元，稅後溢利漲近7成至13.55億元。呢個增長部分原因係一啲中國廠商趕喺特朗普提高關稅之前，將貨物提前出口到美國，甚至有廣東廠商表明會先將貨物囤積喺美國。另外，隨住新嘅海運聯盟生效，鹽田港嘅地位進一步提升，成為華南地區嘅重要樞紐。
港口喺政治同經濟上都佔咗咁重要嘅地位，但誠哥並唔係百分百持有。市場都擔心，繼巴拿馬之後，呢批港口會唔會被盯上呢？近日長和股價幾乎打回原形，唔知今次誠哥又會點樣拆掂佢呢？
免責聲明：本專頁刊載的所有投資分析技巧，只可作參考用途。市場瞬息萬變，讀者在作出投資決定前理應審慎，並主動掌握市場最新狀況。若不幸招致任何損失，概與本刊及相關作者無關。而本集團旗下網站或社交平台的網誌內容及觀點，僅屬筆者個人意見，與新傳媒立場無關。本集團旗下網站對因上述人士張貼之資訊內容所帶來之損失或損害概不負責。
撰文：凍鏈茶圖片來源：資料圖片
