凍鏈茶專欄｜2023金融圈十大回顧 冇樣好嘢歷年罕見

第二位：在高通脹之下，全球進入高息水平，英、美息率高達5厘以上，香港銀行亦不得不加息。人人將錢放入銀行收息，而以往靠借貸嘅企業，就俾呢個高息巨浪冚埋身，有啲垂死掙扎、有啲已經奄奄一息、有啲以往玩槓杆出神入化嘅富豪亦要撲水還債，財富大洗牌。

第三位：受高息影響，加上中國內地樓市銷售強差人意，一向十個煲五個蓋嘅內房，自然首當其衝。當中不得不提選擇違約嘅碧桂園﹐美元債未按時付息而終於爆煲。火燒連環船，一向貪高息買內房債嘅富豪們亦受牽連。

第四位：有傳呂麗君用高槓杆投資內房債輸身家，要大劉出手打救。她早於2021年一擲約1.4億元豪購黃竹坑晉環共4伙，但當中3伙已經港喺月內先後撻訂，前後估計被殺訂約1,050萬港元，現時手頭上仲有最後1伙仍未撻訂。