凍鏈茶專欄｜恒指三年蒸發1.1萬點 港交所換帥救亡
廣告
港交所(388.HK)行政總裁歐冠昇份合約到出年5月任期結束之後就唔再續約。54歲歐冠昇指自己仍健康、年輕及充滿活力，希望花時間反思兼重新出發，制定未來計劃。咁講擺明係不歡而散被人叮走，要搵新路數。二一年加入港交所嘅佢，同鄺其志一樣，只係做咗三年，雙雙成為「最短命」嘅港交所CEO。來自摩根大通私人銀行國際市場部嘅歐冠昇，出任港交所都有過作為，包括優化互聯互通機制、推出「互換通」、引入港幣-人民幣雙櫃台模式、降低科技公司上市門檻，仲大膽提出點解打風期間唔開市。不過真係天時、地利人和問題，佢上任之後，就經歷咗香港最風雨飄搖嘅三年，外圍又加息、連開兩場仗等等，加上香港自身因素，想做嘢都綁手綁腳。
由歐冠昇掌舵期間，正值港股轉勢失守3萬點，恒生指數累跌41%(即11,666點)，同期港交所股價亦大挫四成。其實，呢幾年恒指大跌，最大問題梗係因為佢踢走晒好股，又引入好多劣質中資股，情況有如劣幣驅逐良幣。現時69隻恒生指數成份股佔咗恒指六成市值，頭10隻恒生指數成份股當中，有7隻都係中資股，另外三隻分別係港交所(388.HK)、滙控(0005.HK)和友邦(1299.HK)。最新鮮熱辣嘅恒指季檢結果，又納入理想汽車(2015.HK)同藥明康德(2359.HK)。即係嗰頭藥明康德被美國資金減持，呢頭就有香港人幫佢接捧。恒指於六十年代推出，當時由33隻香港最大及成交最活躍上市公司組成，到今日只淨返4隻創始藍籌股仍有得留低，分別係中電控股(0002.HK)、煤氣(0003.HK)、滙控(0005.HK)、電能實業(0006.HK)，而太古A(0019.HK)就喺上年被剔出恒指成份股，失去持續半世紀嘅藍籌地位。
撰文：凍鏈茶
