兩餸飯行情｜旺角店主日薪750蚊請全職「夾餸師」 網民：人工高過會計文員

隨即惹網民熱烈討論，有網民甚至想知在兩餸飯點工作會否有員工福利：「包唔包兩餐兩餸飯？有冇椒鹽豬扒、蝦仁炒蛋？」

更有網民討論引伸會計、法律等其他行業人工同就業情況。有網民笑言：「我唔會再叫佢地阿姐，應該尊稱夾餸師，香港第五大師。」

網民：會計文員都無兩餸飯咁好搵

有網民表示今時今日，日薪750元已經非常不錯，待遇甚至比不少「寫字樓工」更好，又分享友人工作經歷，稱對方從事會計行業已有十年，月薪只有13000元。有網民亦表示同意：

• 「人工真係幾好。」
• 「日薪750元，價錢真係算係咁，會計文員都只係15000依家街價請你話死唔死。」
• 「呢個時候咁既經濟，有份寫字樓工做已經好好，佢做會計成日OT到八九點，人工好低，但已經好好彩冇失業，出面寫字樓cut人，多過請人，好多公司根本蝕緊錢。」
• 「做會計呢行壓力大之餘好多時OT。」

不過，亦有網民認為，縱使會計文員人工未及「夾餸師」，但若比較工作環境和辛苦程度，仍然遠遠不及飲食業。

• 「你拎寫字樓工同餐飲服務業比，一份係坐低有冷氣對住電腦，基本5天工作收六七點。一份係企足成日，係咁裝餸冇停手，又話多啲餸少啲飯，基本六天工作收10點，邊有得咁比較呀。」
• 「咁計寧願揾10000的輕鬆工好過。」

工作勞損隨時冇得賠

有網友更指出，「夾餸師」工作雖長期重複單一動作，長期工作必定會造成勞損，隨時得不償失。

• 「你都未計因工作勞損睇醫生支出，計埋就同揾一萬的工差唔多。」
• 「如果十個鐘，時薪$75， 12個鐘，時薪只得62.5！長期用力又快動作，一個月就會手神經痛，永遠醫唔好，半夜痛醒。」
• 「呢類工18000睇落好高，但根本冇計長做引起的勞損醫療支出，計番其實同揾一萬冇分別，咁不如一開始就揾份輕鬆的工好過。」
• 「西醫稱職業勞損而這病勞保是不包的。勞損者需要長期服用神經科止痛藥，一般市面上的止痛藥是不能止神經痛的，甚至較嚴重的需要服用鬆筋藥和安眠藥，否則完全影響正常生活。」

按國際勞工組織的定義，職業病是指與職業之間存在著明確或強烈關係的疾病，通常只涉及單一致病原因。因此，「夾餸師」若果因工作而有手部勞損，亦未必能獲得賠償。

只聘25至55歲「女工」

另外值得留意的是，招聘廣告中列明聘請25至55歲女工，但在現行《性別歧視條例》下，招聘廣告中不可列明要求只僱用特定性別。

根據香港大學社區法網，僱主不可因為性別而不錄用求職者，僱主如基於求職者或僱員的性別而歧視他 / 她，即屬違法。例如如僱主認為只有女性才可做秘書，並在招聘廣告上列明此要求，該僱主便可能已違反《性別歧視條例》。

延伸閱讀：兩餸飯當散水餅：網民票選最回本菜式｜點同外籍上司講「請你食散水餅」？

延伸閱讀：兩餸飯殺入金鐘太古廣場 金鐘打工仔：「窮人恩物」賣75蚊食啲咩？