人工$11K靠月供股票儲錢 兩年內要儲$20萬 要點做｜龔成信箱
撰文：龔成 ｜圖片：unsplash
1.累積資產
你好龔成!其實一直我都有留意你post，我都想請教下你，我完全無經驗。
我今年已經解決晒啲債務，應該就以我依家人工有萬一蚊，有少少錢可以儲起佢，但我就咁儲又好似無乜意思，如果我想用2，3千蚊供股，我應該供邊隻，同埋我想係一，兩年有十幾廿萬現金，會唔會大想頭，有無可能做到，請指教，謝謝
龔成老師：
對無經驗的人來說，以月供股票去長期累積資產，是很有效的做法，你可以月供$3000，因為金額太少的話，手續費已佔了較多部分。
如果你月供$3000，堅持進行，2年的總本金是$72000，加上基本的滾存，一般可以達到$9萬-$12萬，要視乎情況，因為只有兩年時間，投資所能發揮的效果較少。
你可以供一隻平穩增值股，一隻潛力股，例如盈富（2800）、比亞迪（1211），各佔$1500，雖然潛力股佔一半略有風險，但就令你成功滾存到$10萬以上的機會較率較高。（對照龔成信箱：Q6843）
2.長和（0001）
你好!我依家手上有
1號 $95.05@2000股
4號 $26.675@2000股
5號 $76.85@400股
6號 $58.5@1000股
2628 $23.1@2000股
見依家股市一直咁跌, 請問應該點部署好呢?
有啲想入多1000股長和
手上仲有大約9萬cash但唔敢放太多去股市上
謝謝
龔成老師：
你持有的都是有質素的股票，基本上可以一直持有，雖然近期股市波動，但只要企業的質素無變，你根本完全唔洗理會股價，集中企業本質及前景就得。
原有的股票，就一直持有，長線投資就得。
如果你再入長和（0001）1000股，就會用盡你手上的資金，同時令你的組合較集中在這股，因此並不建議。
股市波動，你手上的$9萬，可以動用一半去投資，分注買入優質股就可以，但餘下一半要一直持有現金，除非見到大市出現大型的回落，否則一直持有。（對照龔成信箱：Q6806）
3.證券戶口
你好，我對月供很有興趣
但不知怎樣向銀利申請？
龔成老師：
好簡單，你先開證券戶口，到銀行或證券行都得。
開左後，同佢講要登記做月供（不是間間都有，同時能供的股票，每間不同，收費不同，你要問清楚先）。
例如登記供盈富（2800），每月的金額，例如$5000。咁佢就會每月的某天，同你扣$5000，在當天的市價買入盈富，每月如此，就是不斷累積。（對照龔成信箱：Q6807）
4.下跌空間
最近我見不少股票跌左唔少，有不少已經跌穿左60天線，但是還有下調的空間？
龔成老師：
所謂的跌穿XX天線，根本是完全無跟據，而所謂的仲有無下跌空間，同樣是無得預測的，因為全球所有最賺錢的投資者、基金經理，佢都都唔會信d幾多天線，這只是財演的說話技巧。
只要你見到企業優質，價格合理，就可長線投資，買入後無人知中短期升跌，但長期都會因企業增長而股價向上的。（對照龔成信箱：Q6808）
5.潛力股
我投資組合中，潛力股比例不少，這樣係咪風險唔夠平衡？
我比較年輕20幾歲，希望先增值，後現金流去投資，所以較多潛力股，請問你會推薦咩股票較為穩健的以平衡風險呢？
我都認同汽車股，軟件股估了不少，因為呢行業有產品╱服務擁有潛力市場，請問仲有咩其他股票同樣有潛力市場你係推薦呢？
你認為銀娛27有咩產品或服務有潛力市場，使佢成為潛力股？謝謝！
龔成老師：
潛力股是有風險有回報的類別，行業的變化較大，所以有潛力，但同時有不確定，因此投資時要控制好比例，不能整個組合也集中在潛力股。
年輕人可投資在潛力股的比例，可以比其他年齡層的人較多，因為7承受風險能力較高，例如去到6成，但潛力股是較高階的投資項目，要投資者有一定的投資知識與技巧，如果你未能掌握選股、分析企業、企業估值、買賣時機等技巧，潛力股佔比只能去到3成。
新能源股、科技股、教育股、醫藥股都是潛力股的類別，但部分有少少貴，你要小心分析。
銀娛（0027）有點潛力的，我對這股評價都很高，有投資價值。（對照龔成信箱：Q6810）
6.熱門股
其實如果一隻股該年當炒，係咪該年都唔應該沾手？
就算好優質都好好似教育股同藥股，因為我想買中生製藥同楓葉教育
龔成老師：
我地會避免沾手，又或會減少投資。
凡是熱門股，往往是市場焦點，因此一定會被市場炒起左，估值較高，就算股票優質，但在貴價區買入，你的回報率也會被拉低。
近年，教育股及醫藥股正是有這情況，行業的增長理想，本身有質素，但已被炒高，但不是不能買入。只要你小心選優質股，同時做好估值，如果佢的股價只是合理區少少，你都可以先小注買入，然後升就不再加注，跌就加注，這都是策略。（對照龔成信箱：Q6811）
7.月供股票
龔sir你好！上次你的回覆，我見月供股票方面你分別了兩類，有風險同冇風險，啟發了我試著查找各種不同種類的公司，它們的背景、運作、經營、發展等。
現在的目標有穩健嘅恒基、港鐵；同進取啲既長建、金沙。我這分類可以嗎？
我偏向進取少少的，揀以上兩種股票當中一隻作月供，又是否合適？該如何組合？萬分感謝！
龔成老師：
上述都是優質股，都可以月供的。其實上述股票的增長力都相約，都是有質素的，供那一隻都無問題，睇你自己睇好類間公司，邊一類行業。
你投資港鐵（0066）、金沙（1928）啦，長線月供可以的。記住，月供股票一定要長期進行，不要理中短期的股價波動，長供，長線持有。（對照龔成信箱：Q6812）
8.唐宮中國（1181）
想問襲老師 點睇1181 唐官中國前景 另外佢最近拆細你有如何睇法?
龔成老師：
唐宮中國（1181）有一定的質素，佢係中國經營連鎖飲食業務，提供多元化餐飲選擇及餐桌服務，以及婚宴服務。餐廳提供各種中式及日式美食，該等品牌包括唐宮海鮮舫、唐宮壹號、盛世唐宮、唐宮膳等。
過往的生意同盈利都有理想的增長，業務不錯，前景都不差，這股有投資價值。
至於拆細因素，只要一些財技，令股價自然地下調，令人感得平一點，對企業本質沒有影響。（對照龔成信箱：Q6813）
9.優質股
你好老師，想問一問2314理文造紙是否屬於優質股。
謝謝
龔成老師：
理文造紙（2314）不過不失的。
佢的生意其實有不錯的增長，但盈利就有點波動，這反映市場的確有自然的增長，但由於紙價及成本等問題，令佢最終的盈利較波動。
這反映佢有一定的賺錢能力，但營運模式就比較被動，產品價格的自主力不算強，因此質素不算最高級別。
質素中等，都算有投資價值，但就未必值得好太注投資。（對照龔成信箱：Q6814）
10.長城汽車（2333）
成老大 我11蚊買左2333 而家情況越黎越差
龔成老師：
長城汽車（2333）中短期仍然會較弱，不要對股價有太大的期望，只於長期計，不會太差，但要上翻去你的位，未必容易。
