玩交友App誤中連環投資詐騙 32歲港男買油買幣交百萬智商稅 第一期都還唔到

衰貪心搞到狂借錢

日前，有網民以「求救 借左好多還唔到，應該破產？」為題在連登討論區發文，指自己32歲月入2.5萬元，最近連續遇上投資詐騙，並且「衰貪心搞到狂借錢」，「近兩個月借左好多間銀行錢，加埋成百萬，但我連第一期都還唔到」，詢問網民該如何是好。

樓主又在貼文中詳細解釋欠款：

• 恆生加埋24萬(有信用咭分期同貸款，本身有d還左幾期)
• Mox 6萬(每期10333，分6期，未開始還)
• Livi 20萬(每期3873.33，分60期，還左1期)
• Weland 10萬(每期4763，分24期，還左1期)
• 中銀20萬(每期4251.33，分60期，未開始還)
• 天星 7萬8(每期2247.98，分60期，未開始還)

被呃買原油買幣出事

樓主進一步解釋，自己今年32歲，月入2.5萬，穩定文職，與兩老居於公屋單位，平日一個月洗費約1萬元。目前財政狀況，上述欠債當中有一些第一個月已經沒有能力償還，「屋企人同朋友都幫唔到手，所以已經唔知點算好，個人好慌諗唔到野，求各巴打點條明路我行。做idrp,iva定破產？老實講我唔想破產。」

貼文一出，隨即引來網民熱烈討論，在網民詢問被騙的手法後，樓主解釋：「交友app識人，俾佢呃左去玩買原油，點知拎唔翻d錢出黎。又識到另一個人介紹買幣，贏左d但又拎唔翻出黎。」

從沒還錢便破產或被告詐騙？

除了有大部分網民恥笑樓主「交智商稅」之外，有網民好心建議樓主捱麵包還錢或者去做債務重組：

「做債務重組好過吧，你還一筆200萬既錢同還幾十筆 4-10萬既錢係好唔同架，前者利息會平好多，只要你有良好信用紀錄，加仆心仆命每個月準時還錢就唔怕。」

「其實你搵方法找到信用卡筆數，下面個堆你人工係夠cover，有d咁短期捱幾個月麵包就得。」

但亦有網民認真分析，指樓主新借欠款不能夠做債務重組或破產，因為由頭到尾沒有還錢便破產，有機會被銀行告詐騙：

「全新新數唔洗諗債務重組，破產都有機會俾人告詐騙。你冇得搞嫁啦。捱兩個月先破產啦。唔係二個月後就可以破產，係你第一期都唔還就破產，可以證明你由頭到尾都冇諗過還，咁人地銀行係有機會告你詐騙。」

有網民就真心問摟主為何可以「咁有決心一次過分開借咁多」，其他過來人就代答：

「賭性太強，好老實，比樓主過左呢關都可能會再犯，破完產，好可能全世界都有機會追到record，建議樓豬夜晚打返8碼保安訓教收多一萬。」

「其實我都有啲似樓豬，愈來愈多洗費同信用卡洗費拖得就拖，但好在我收入比較高，同chur埋自己一星期返7日，2-3個月就還晒啲幾十萬卡數。」

延伸閱讀：內地客魂斷「嘔吐山」！澐灃3年勁蝕2,200萬 網民預言：一通關好似倒水咁

延伸閱讀：任澤平撰文替比亞迪平反 暗串巴菲特「92歲廢老」脫節沽錯貨！