二手樓市交投淡估價跌 年底入伙新樓隨時有撻訂潮｜凍鏈茶專欄
廣告
中原城市領先指數CCL上星期報141.24點，按周跌約0.40%，連跌4周共約2.27%。二手樓市交投疲弱，樓價跌勢未止，指數跌穿撤辣前143.02點低位。撤辣之後，成交的確好過一輪，不過現時已經打回原形，早前七一回歸三日假期二手樓合共只得12宗成交，有部份屋苑甚至捧蛋，如海怡半島、黃埔花園及沙田第一城。
一手成交方面，之前有統計數據指6月份一手不足700宗，即係加埋二手樓，成交估計一個月都係唔夠1000宗。全港持牌代理人數有39,043人，即係有成38,000幾人無單開食白果。
代理無單開當然擔心，但最多轉行，一班新業主仲憂心，信和置業(00083)、嘉華國際(00173)及中國海外發展(00688)合作發展嘅元朗錦田南錦上路站柏瓏II，兩年前賣樓花，成$1.8萬一呎。但望住現時錦上路一帶既半新樓，好似新地(00016) 「峻巒」、路勁「山水盈」，二手價都係賣緊$1萬蚊呎。元朗Grand Yoho，雖然係2017年入伙，但勝在係元朗站，呎價都係$1.3萬左右。
撰文：凍鏈茶
