順豐王衛 集資縮水頂硬上「有人好想佢嚟香港上市」︳凍鏈茶專欄

王衛10萬港元起家

王衛1971年上海出世，父親係一名空軍俄語翻譯，母親係江西一所大學嘅老師。不過王衛7歲就嚟咗來港，仲係早期嘅水貨客，1993年順德獨資創辦順豐，以10萬港元起家，同時喺太子砵蘭街租咗個幾百呎地鋪，專係幫企業運送信件去佢自己鄉下順德。當年佢食正工廠北移，香港同珠江三角信件往來頻繁，嗰陣時郵寄最少兩至三日，費時失事；有公司於是委托水貨佬兼帶急件過關，速遞公司應運而生，佢就成功開拓香港同埋珠三角文件速遞。有指當年王衛全公司得6個人，王衛要親自中港兩邊走，仲以割價搶灘，人家收七十蚊一件貨，順豐就收四十蚊，靠貨量拉低成本。當年順豐生意愈做愈大，貨車員工經常霸佔成條街，仲惹來隔離鋪不滿，所以砵蘭街老街坊應該都對王衛印象深刻。

逐步建立物流王國

2003年公司趁航空運費大跌之際，順豐同揚子江快運簽定合約，成為當時內地首間使用全貨運專機嘅民營速遞企業，逐步建立自己嘅物流王國。根據《2023胡潤全球富豪榜》，順豐老闆王衛以身家1250億元人民幣喺大中華區中排名第20位，全球排名122位 。順豐控股（002352.SZ)早於2017年喺深圳A股借殼上市，可以講係騎牛上市，但今次返香港第二上市，市况就有天淵之別。

有人好想佢嚟香港上市

不過無論78億定156億，都已經分別唔大，反正有人好想佢嚟香港上市。之前李家超提出要善用與內地市場「互聯互通」嘅優勢，「吸引更多內地大型企業來港上市，包括優化審批程序。」所以就算個市唔好，都要頂硬上，俾吓面政府。