租盤多圖｜屯門500呎「桑拿房」月租$6,800 網民：似豬欄扮屋多啲

近日，有業主於社交媒體放租屯門一間500呎租盤，月租叫價6,800元，並表示附基本傢俬及電器。然而平房的「日系小木屋」風格，不論裝修抑或格局都酷似桑拿房，引來大批網民在貼文下留言。

網民：租盤係咪包埋桑拿師傅？

由於牆身採用桑拿式垂直木條設計。有網民笑言：第一次見桑拿室會裝冷氣。

• 「一睇裝修以為去左車站 或 去左準備浸溫泉」
• 「日日翻屋企都有桑拿嘅feel，正～～」
• 「請問$6800一個月包唔包按摩？」
• 「6800蚊就可以日日去日本旅行，抵到爛。」

網民：其實可以用嚟拍劇

除了桑拿房外亦有網民表示，單位設計感十足，可以作拍電影取景之用，不過亦有留言覺得，木屋的設計好像檢疫中心。

• 「電視台佈景？！」
• 「貨櫃桑拿房？十足十賊竇。」
• 「好似隔離營。」
• 「好似打喪屍game，行入去啲細房拎物資嗰啲房。」

疑似改裝貨櫃屋

除了留意裝修設計外，有網民發現單位的格局與平常住宅有異，窗口的位置亦較奇怪，擔心租盤並非普通平房，實為改裝貨櫃屋，提醒網友避免受騙。

• 「似係貨櫃屋，月租$3000也要考慮。」
• 「貨櫃屋隨時比人成間屋吊走。」
• 「應該係附近嗰啲貨櫃屋或者以前係豬欄改成房屋。」

業主稱，放盤行路10分鐘便到達附近的富泰商場，商場設有街市及多間餐廳，應有盡有。雖然前往兆康西鐵站需要20分鐘，但業主聲稱設有免費接駁巴士，而且有小巴往返屯門市中心之餘，亦有24小時小巴往返九龍。

延伸閱讀：父母立遺囑防女兒爭產 居屋、積蓄全留兄長 外嫁女喊爆：明明我付出最多！

延伸閱讀：樓價集體「笨豬跳」：太古城時光倒流2017年 仲有一區私樓跌足23%！