2年前炒期油輸身家呃老婆照結婚 公司裁員被逼再賭crypto 網民由同情變恥笑

腳踏實地還款兼儲錢

該名網民以「我都唔想再賭 實在係為勢所迫」為題在連登討論區發文，表示自己兩年半前炒期油輸光50萬積蓄，但最後亦瞞住老婆借了50萬私人貸款，處理了結婚及住屋等問題。

「之後一直腳踏實地，唔再掂期貨同其他衍生工具，甚至股票都無買。每月還萬幾蚊，因為有穩定收入，唔算辛苦之餘，都仲儲到少少錢。」

然而好景不常，直到三個月前樓主公司裁員，樓主突然全無收入，但每個月仍要還萬多元貸款，加上自己的生活費、家庭支出、兩老家用等，壓力十分大，預期不出數月，僅餘的十萬元都會全數蒸發。

「所以，戒左賭兩年幾嘅我，今日決定要重出江湖，請各位巴打祝我好運。」

網民初時力勸樓主回頭是岸

貼文一出，大部分網民初時均同情樓主，同時指樓主應該向老婆坦白並正正經經搵過份工，又苦口婆心提醒樓主回頭是岸：

• 「拿拿聲搵份工好過啦。」
• 「你嗰十幾萬會捐埋比大戶。」
• 「愈窮愈見鬼 真係冇講錯，勸你唔好啦。」
• 「依家你仲有得揀，快手搵工咪諗咁多。」
• 「如果真係要賭，唔係搵賠率高贏面低既野買，要搵贏面高賠率低既野去砌，即係佢地講既expected value要正數。」
• 「真男人唔好將自己蘇州屎累到人，諗到點樣老婆講再見。如果好Ｘ唔捨得，勸你用盡混身解數都唔好落場賭，贏家只有5%。」
• 「建議同你老婆坦白 再拉長還款期…….」
• 「同老婆講啦Ｘ，患難見真情，唔係自己冒險賭到爆煲就係男人。」
• 「同你老豆老母老婆坦白，返住份工還咗d債先啦，你依家自己逼死。」
• 「投資又好，投機又好，千萬不可以用自己生活費，好大壓力，而好大壓力下判斷會出錯，回頭是岸。」

轉炒crypto 網民同情變嘲笑

然而，樓主似乎並沒有接受網民的逆耳忠言，而是決定轉玩crypto合約：

「因為之前玩過港股、美股、金、銀、油、氣、波、馬，都唔係好岩我。今次打算用僅餘嘅10萬積蓄，玩crypto合約。

唔好意思，因為未接觸過唔識搞，所以頭先搞耐左少少。岩岩已經註冊左新Account，買左幣入左落去試玩。因為新玩，玩住一半積蓄5皮野先，萬一輸晒都仲有錢還多幾期p loan所以起步資金大約6500U。」

見到樓主一錯再錯，網民同情心盡失，轉為嘲笑：

• 「遲啲撈底美股仲好 好玩唔玩玩斃。」
• 「大鱷點心。」
• 「係咪想玩資產歸零 大抽獎。」
• 「死Ｘ緊都得… 美股唔玩都算，玩垃圾港股都好過玩呢類老千野。」

延伸閱讀：30歲港女呻「月入6萬」男友已絕種 網民一句秒殺：你擔心時間值損耗先啦

延伸閱讀：美股反彈只屬曇花一現？大空頭發佈悲觀預測：熊市喺2023年繼續玩！