凍鏈茶專欄｜三線城市「蜜雪冰城」攻港 鋪租每月廿萬托起舖市

不過，鋪市終於傳來好消息，而托起舖市嘅全靠一間內地三、四線城市「梗有一間喺左近」嘅蜜雪冰城。

蜜雪冰城出名賣手打檸檬飲品，仲要係新鮮檸檬，而且定價非常之低，內地一杯檸檬水只係賣4蚊人仔。嚟到香港，檸檬水足足貴內地一倍要成9蚊一杯。不過七仔賣凍檸茶都十幾二十蚊一支，所以足以吸引到一條長龍。

有指蜜雪冰城計劃來港上市，集資約10億美元，美銀、高盛、同埋瑞銀為蜜雪冰城聯席保薦人。 上市之前，梗係要造勢，估計隨時喺香港十八區，最少一區一間，唔係幾時先夠營業額上市。

如果係咁，話佢能夠托起舖市真係一啲都唔誇張。旺角呢間舖，聽聞月租 20萬，如果淨係用檸水計，單係交租一個月就要賣成22,000杯檸檬水，即係一日就要賣740杯，一日開足12個鐘，每個鐘要賣60杯，每分鐘要賣1杯，先叫打個和，仲要未計其他人工雜費﹗繁忙時間都可以做到，但整體嚟講難度十分之高。香港人就出名三分鐘熱度，唔知捱貴租嘅手搖飲舖可以頂幾耐呢？