零食任食 返工可飲啤酒 貼地創業老闆：憑咩要員工攞條命同你搏？
撰文：Hody ｜ 攝影：何柏基
創業經驗無私分享
在商言商，不少生意人都避諱自己做生意的成功「技倆」，但Michael卻樂於分享成功經驗，「蝕抵就是投資，幫人等於幫自己」是他的座右銘。
他認為做生意要不斷學習，「雖然我創業唔係好耐，我亦都無乜讀過書，但我呢3年為咗我嘅事業用咗好多心機，我走訪咗好多唔同嘅商會，亦都創立咗一個商會去分享創業嘅經驗，主要係想聯合一班中小企業，互相幫助、互相學習，而唔係互相攞生意。」
做生意要不斷學習
主要做網上生意的他，經常透過商會舉辦分享會，例如分享「點樣用低成本去宣傳」、「點樣做Facebook生意、點樣喺Facebook做宣傳」。
「例如你用Facebook做生意，好多人以為擺啲嘢上網就會有人睇，其中當中有好多橋妙嘢，我最初都係乜都唔識，咁我就去學，去聽講座、上堂…..」
他笑稱：「記得當時有人講Ai，我問：『咩叫Ai？人工智能呀？』原來係Adobe Illustrator，我都唔識，我就去學。當然而家都唔叻，但起碼知道個框架，知道基本嘢先，我淨係學皮層嘢，人哋講ReMarketing，我就去學ReMarketing；睇GA要好熟，我就一定要學識點樣用GA；人哋話要識SEO、SEM，我就一定要學識呢兩樣嘢！總之有人同我講，網站要識乜嘢，我就一定要學識佢！」
他指看到人家成功之處，就一定要親身嘗試去做、去試。「所以嘢都係學返嚟，要親力親為！」他堅定的說。
喜歡聘用無經驗90後 「唔識問Google！」
當社會都喜愛標籤90後「一代不如一代」之時，Michael也覺得現今的90後責任感較弱，但他仍然喜愛聘用沒經驗的90後員工，「我大部分同事都係90後，我鍾意請一張白紙，鍾意請無經驗的，因為我想創新，例如Marketing、Design同事，我就會請一張白紙，因為我覺得個Trend係屬於年輕人…創作上嘅嘢可以自由發揮，我淨係教佢哋一樣嘢，『唔識問Google！』唔使問我，因為每次唔識去問我，就會依賴咗我，所以唔識應該問Google，我當初都係乜都唔識，全部都係自己學返嚟。」
他指，世界變得太快，他應該用一張白紙，與他一起與時其進，「我橫掂都係一張白紙出嚟，點解我今日做得到，因為我與時並進！」
做老闆 應讓員工返工開心
說到企業文化、員工管理，打工仔出身的Michael自有一套人事管理理念，「企業文化是需要的，例如返工好多嘢都應該遵守，但我自己就想將10幾人嘅公司打造Family感覺…作為老闆，我覺得應該做一些事令員工覺得返工係開心的…我係打工仔出身，知道公司俾好多嘢，但員工未必想要，其實打工仔最想要嘅係自由，但我又無可能叫你喺屋企返工，但原來你返到公司，可以行來行去，可以周圍同人傾計，咁公司擺得零食就梗係俾人食，食得就梗係開心Share，咁呢種文化就算係5人公司、或者係500人公司，都可以做到。」
零食任食 工作時可飲啤酒
Michael指因為自己做過打工仔，知道同事間相處開心好重要，故公司經常搞Gathering，希望同事有Family感覺、希望同事間相處會開心。
「見同事多過見屋企人，同事嘅默契同尊重係必須的」，同事想去打泰拳，他又會Sponser員工去公司附近的泰拳館免費玩。
他主張與員工像朋友式相處，Michael指公司連啤酒都是任飲的，「我哋啲同事係買晒啤酒，然後同我講：『攞錢嚟！』我就話：『好好好！』…我唔要我啲同事叫我做李生、亦都唔要叫我做老闆，要叫Michael！入房唔好敲門！公司嘅產品服務當然唔使錢，如果有機會想我去栽培你，我係會出心出力出錢去栽培你，俾你去行商會、去讀書，我都願意。」
「憑咩要求人哋攞條命同你搏呀？」
香港現時失業率只有2.8%，「有工無人做」的情況比比皆是，Michael卻未有害怕人才流失，「如果同事有個更好嘅發展而我係俾唔到嘅，咁我唯有係鋪紅地毯送佢走！」
他貼地的說：「打份工啫，做一世咩？你無可能操縱佢哋做一世，除非佢哋做得開心，自己甘願留低。例如我啲同事，我從來唔會叫佢哋OT，我從來無控制佢哋幾時返工、幾時放假，從來無人同我講，佢哋自己喺月曆寫… 」
他坦然，當然會有同事射波、會遲到，但他不會鬧，也明白同事都是打工仔，「我公司又唔係上市公司、又唔係國際企業、又唔係好好人工，憑咩要求人哋攞條命同你搏呀講真？」聽到此處，記者當時心裡暗忖：「你公司仲請人嗎？」
管理員工應了解他們需要
Michael認為，作為老闆，首先要了解員工返工係為乜嘢？
「為開心？為發展？為人工？知道佢哋返工為乜嘢？我先可以俾到佢哋。如果佢哋答我為錢，要3萬蚊人工先可以夠生活，咁我會諗辦法點樣俾佢學多啲嘢、叫佢再進修，讀多啲書，然後再出去搵一份更好嘅工作，因為我真係俾唔到佢。如果佢要開心，就話俾我知點樣叫開心，我盡量俾開心你，咁但係唔可以同我講唔返工就開心！係要點樣可以做嘢嘅情況下搵到開心！你要學嘢、我就俾機會你去學；有同事明言想要發展、有野心，咁就要付出、要裝備自己，呢個世界唔會有人無端端俾機會你。」
要上位 先要裝備好自己
「我以前由最低嘅Sales出身，跟住做到主管，再做到經理，再到分區經理，一直做上去，我每一次嘅職位假想敵都係高一級的上司，做Sales時就同自己講一定要學識主管的職務，到可以升職時，我就可以勝任，因為我預先已經裝備咗自己。」他說。
Michael認為，作為打工仔，不應存在「一步登天」的想法，應向覺得值得欣賞的人學習，「做得好嘅要抄，做得唔好嘅要改！」當機會來臨，就可以捉緊機會。
