3招用英文諗嘢 講英文都流利啲

英文要講得順口？你估話咁易咩？平日都係用開中文，點知老細一個唔該要我同個外國客傾嘢，真係轉都轉唔切Channel，嚇都嚇死。如果唔想錯過呢個博上位嘅機會，一定要學好啲英文，為升職做好準備！要練好英文都唔係一朝一夕嘅事，今集阿滴就教你幾個英文思考嘅方法，從小事開始練習英文，突然要用都冇有怕啦！

方法一：Single word reflex

一句長嘅英文句子，看似複雜，其實咪又係由一個個詞語組成。所以，阿滴建議我地可以從單字開始練習。隨時隨地見到咩就即時諗下佢個英文，例如，你見到張枱，就會即刻諗到 a table；見到本書，就即刻諗起 a book。如果見到一件你講唔出英文係咩嘅嘢，好簡單，問下GOOGLE 大神咪得囉，咁又學多個字喇！

方法二：Chunking

Chunking 嘅意思係幾個英文單字拼出黎嘅詞語，例如：as a matter of fact 係解事實上，而唔係 “as”, “a”, “matter”, “of”, “fact” 分開五個單字嚟睇。一組組英文咁去記，就可以一次背多幾英文字。講多個例子：make yourself at home 嘅意思係唔使客氣、自便嘅意思。呢啲片語雖然係長少少，但係勝在易記又好用。所以如果你平日聽到呢類片語嘅時候，不妨都可以記低佢。

方法三：Substitution Drill

Substitution Drill 就係用英文句式仿作。聽到句式唔洗驚，唔使好長，可以由好簡單嘅短句開始。例如：I want to 之後係加動詞，你就可以開始無限作句： “I want to play,” “I want to dance.” ，之後仲可以愈加愈長： “I want to practice more, so I can improve.”。慢慢學多啲句式，自然英文就會有進步了！

大家不妨可以試下用呢三個方法練習多啲用英文諗嘢，練習得多自然講都講得順口啲！