「剩女」破百萬？買樓有啟示！

朋友：「嘩！原來香港有100萬『剩女』，每七個人就有一個。」
筆者：「唔係化？！」
朋友：「報導係咁寫喎，仲話沙田最多，都話『男女失衡』…」
筆者：「咪住！咁『剩男』呢？」
朋友：「睇睇先…都有成97萬喎！」
筆者：「咁即係唔係『男女失衡』啦！」

「剩女」總覺得有點貶義，講到好似賣剩蔗咁。細讀有關報導，原來將所有「未婚女性」都稱作「剩女」，而將所有「未婚男性」都稱作「剩男」，筆者豈非其中之一？肯定唔係賣剩蔗啦，不知幾咁搶手，哈哈！

在筆者眼中，所謂「剩」其實有主動與被動之分，「被動」的意思是，如果是條件差、無人要，這才是真正的「剩」。「被動」的意思是，唔係冇人要，只係唔啱自己心水，情願唔要，咁就唔應該貶為「剩」啦。

社會家庭觀念改變

筆者曾經拜讀日本著名管理學家大前研一《一個人的經濟》，唔係講笑，呢本書對買樓很有啟發。

老爸老媽流傳下來的觀念是，要努力讀書，努力工作，到了適婚年齡，找個對象成家立室，開枝散葉，老來從子。然而到了這一代，家庭觀念已經非常薄弱了。

先講婚姻，山盟海誓？呢頭結婚，嗰頭離婚，大有人在！對成世喎，如果唔係真係好鍾意，與其是是但但揀一個，不如瞓多覺！

再講子女，老來從子？今時今日仲諗住老咗靠仔女照顧？唔係化？！唔敗晒你副身家，唔使幫佢畀首期買樓已經偷笑，又或者一個唔覺意去咗工作假期唔返香港，下半世幾乎見佢唔到，為乜？仲大拿拿幾百萬元養一個，擺明係奢侈品啦！

如是者，筆者很多朋友都選擇單身。亦有不少朋友即使結婚，亦選擇二人世界，不要子女。

細單位需求上升

咁同買樓又有乜關係？皆因置業觀念已經全面扭曲。為甚麼近年細價樓橫行？除了因為樓價貴，市民根本買唔起大單位之外，最重要是因為人生觀念改變，置業需求改變。

100萬位「剩女」減去97萬位「剩男」，男女失衡僅3萬而已。若果好似上一代，個個都想成家立室，生兒育女，就會有97萬個家庭客，3萬個單身客。換句話說，會有97萬個兩房、三房以至更大的單位需求，納米單位僅3萬個。

現在個個情願單身，一個人住，要咁大個單位做乜？未抹過地咩？於是就湧現大量的一房、開放式單位需求，隨時逾100萬間。

朋友問：「細單位供應越來越多，會否供過於求？」
筆者：「追得上社會結構改變先講啦！」
朋友問：「乜乜統計話大單位供應少喎，係咪更有投資價值？」
筆者：「買得起先講啦！就算買得起，都未必需要啦！」
朋友問：「咁細單位係咪即係仲買得過？」
筆者：「有需求都要睇價錢，依家炒到過晒籠啦！如果同一個屋苑入面，一房單位同兩房單位只係相差幾十萬元，做乜唔買間大？如果價錢稍為調整，呎價貼近番兩、三房單位，貴少少唔緊要，唔好好似而家咁貴兩、三成，咁就買得過啦！」