港女月入10萬唔掃地、男友力數7宗罪反被轟：點解要陪你捱窮

女友月入10萬家有3個工人

該網民在IG專頁＠couple.murmur投稿，表示與女友拍拖已經有一段時間，近期女友多了上自己家，發現她原來有很多事都不懂得做。

樓主進一步解釋：「佢前年為咗就返工地點已經搬咗出去住，佢屋企人調咗個工人去佢到，定時定候去打掃煮飯。所以佢平時乜都唔洗做，放工返到去就hea。」

「我知道佢係一個有錢人，佢人工一個月都有9-10萬，更加唔好講佢屋企。之前上過佢屋企一次，又咁鬼遠，得嗰3丁友洗唔洗住咁大？3丁友都要2個工人？而且女朋友連基本日常生活嘅嘢都唔識，好有問題。」

力數女友七宗罪

之後樓主更「開衡turbo」力數女友七宗罪：

1. 唔識拖地掃地，唔識用吸塵機
   （佢話平時屋企有掃地機，同埋有工人拖，唔洗自己做）
2. 唔識煮飯洗碗
   （都係工人煮同洗，有時仲會叫外賣同個工人食）
3. 唔識洗衫
   （工人洗衫，仲叫佢摺埋衫）
4. 通渠洗廁所嫌污糟
   （佢話：俾錢人通就解決到，依個世界個個都識通渠就唔會有通渠佬）
5. 咩重嘢都拎唔到，例如拎部影印機都要我幫
6. 唔鍾意搭地鐵
   （佢話好逼仲要冇得坐，因為冇揸車，成日搭uber）
7. 雙面人
   （對住我就成日黑面反白眼，話我成日講埋啲大道理唔實際，對外人就恭恭敬敬好有禮貌）

樓主：請工人要錢

之後樓主道出二人矛盾的核心原因，原來是因為女友建議請工人或叫男友搬去女友家，但樓主認為請工人要錢：

「佢嚟到我屋企之後佢都有學做家務，但係佢有時會做做下就發脾氣，不停話請工人請工人。佢仲叫我搬過去同佢住，我先唔要寄人籬下。仲有大佬，請工人要錢，同埋自己做到嘅嘢點解要麻煩人哋？佢仲要好串咁話：『我攢咁多錢就係為咗享受，我返到屋企已經好攰，點解我仲要自己做呢樣做嗰樣』」

最後樓主更指：「我明明係為佢好，想佢有返啲生活知識，點解佢唔明白我嘅苦心！我好想係佢28歲前就改變好，到時我哋有自己嘅二人世界，有自己嘅家庭！」

網民：年青人試下用腦

樓主可能心裡面期待激發起網民的仇富情緒，豈料圍爐失敗！雖然有零星網民力撐樓主：

「其實識做家頭細務好重要，我覺得男人思維都想搵個上進嘅女仔過人世，而唔係樣樣野都用錢解決，咁樣真係唔識照顧自己，當去個旅行有咩意外身上又冇錢冇得禁機，所有醜態就出哂嚟。女人唔識做家頭細務又唔識煮餸，我覺得同窮冇直接關係，就算幾有錢男人都想搵個照顧到自己唔係樣樣野用錢解決嘅女人。」

但大部分網民都狂轟樓主的窮人思維與女友不夾，認為富人思維是用錢買時間，沒有不妥，亦有人指很多男人月入10萬一樣不懂得換水喉：

• 「點解你要強迫佢同你捱窮。」
• 「你無錢d嘢要自己做返者，人地揀用錢解決又唔係用你嘅錢解決，點解要逼人同你一齊做。」
• 「有錢請工人點解仲要識要辛苦自己？貧窮限制想像？」
• 「識揾錢咪得，佢做家務嘅時間可以用黎generate 更多嘅收入，多過做家務嘅時薪有凸，而且佢自己出錢請人，唔想自己勞損，有乜問題？唔通你叫個揾錢嘅金牌sales去做公司嘅office boy嘢？拎部影印機都要你幫就係廢？呢啲嘢係相對，大隻佬都會覺得你拎兩支水都要人幫係乜都唔識做。各司其職啫。」
• 「只可以講你哋價值觀唔夾，有錢人嘅思維不嬲係用錢換時間，佢梗係唔做家務嘅時候搵到嘅錢多過請工人嘅錢先咁講。」
• 「我有10萬一個月都唔做家務啦，年青人試下用下腦啦。」
• 「佢到底睇中你D咩。」
• 「大部分白領月入十萬既男人都唔會識整水電煤通渠啦。」
• 「月入十萬已經係另一個class，做咩仲要用基層把尺去度人？」

延伸閱讀：Fresh grad被索1萬家用 公開阿媽「搶錢」惡行：誤信傳銷仲變埋蛀米大蟲

延伸閱讀：港媽苦等公屋6年 發文嘆用盡3次機會「好失望」：長康邨細到爆！