90後出路 移民台灣發掘真正生活
特別喺小圈子個結果出咗嚟之後，我更加積極搵吓啲移民資料。睇過歐美各國，個個都要百幾二百萬咁，心諗唔通真係走投無路？但又突然醒起我仲未睇吓近水樓台嘅台灣移民資料，睇完，當堂令我覺得呢個世界充滿希望！
去過台灣旅行兩次嘅經驗話我知，嗰度嘅生活節奏比香港舒服好多唔洗趕頭趕命，而最緊要嘅係，體驗過當地嘅醫療服務後，更加覺得台灣人真係溫柔又貼心好多。嗰次入院睇急症，唔洗等十幾個鐘，而且醫生護士都好溫柔，直頭有種重返童年畀人照顧嘅感覺。我覺得，病嘅時候係要需要有人呵護吓自己，但喺香港睇親醫生都黑口黑臉，燒到百幾度都當你呃佢醫生紙咁嘅臉口，入醫院又畀人呼呼喝喝咁。病人啫，犯法啊？
對於情竇待開嘅一眾港男嚟講，台灣真係一片福地。嗱我唔係話港女差，不過就真係比台妹比下去囉。台妹識打扮又識哄人，而且又特別鍾意我哋啲港男，作為港產小毒毒嘅我喺一班台妹眼中竟然可以一嚐做搶手貨嘅滋味，一直令我對呢個地方好迷戀。。。
同埋移民過台灣真係快靚正，移民申請快到三個月就搞得掂，唔似美帝咁玩你十幾廿年後嚟個特朗普，又無了期咁等落去唔知等到幾時。
我本身已經大學畢業咗成年，如果我去台灣讀埋個碩士，畢業後住夠五年，最近1年喺台灣平均月賺夠一萬港紙就可以定居。其實呢個方法幾吸引，但係無啦啦走去讀個碩士我又唔係好想。不過總算畀我見到另一個方法係我比較有興趣嘅。
其實我一直都有個夢想係想開間cafe，如果想長期做生意，只要創業基金有最低50萬台幣就可以拎到台灣嘅創業家簽證，每年通過當局查核，做夠5年，每年住夠183日，就可以入籍，呢個方法真係好吸引！一來個本唔係好多，但又可以畀我發吓創業夢喎！
而且我又好鍾意揸電單車，有啲台灣朋友同我講，台灣之所以周圍都係綿羊仔，就係因為油費夠晒平，揸足成個月都唔洗一舊水港紙！咁又可以完咗我個車主夢！同埋喺台灣啲樓平香港幾倍，同一個價錢，喺香港屈間百幾呎劏房嘅時候，已經可以喺台北買到千幾呎單位，想像吓呢一個將來係幾咁美好？做老闆、做業主、做車主、畀女圍、做自己想做嘅嘢、擁有自己想要嘅嘢、過啲輕鬆嘅生活。。。。。。
依家開始努力儲筆錢，目標喺林太卸任前走佬！
