想每月有錢剩？要學識理財六大法則

其實理財並非一門高深學問，只要好好分配自己的收入，再清楚自己開支，儲得第一桶金後再錢搵錢，要達致財務自由並非天荒夜譚。

1. 記錄每項支出

正所謂數目要分明，連自己每個月啲錢去哂邊都唔知嘅話，就好難節流。車費、飯錢、日常用品以至衫褲鞋襪，通通記錄在一本簿仔或手機上，每週結算一次，邊方面開支最大，從而喺嗰方面入手節流。例如今個禮拜多咗應酬，下個禮拜就帶吓飯、食平啲補返數啦！

2. 按比例分配收入用途

有啲每月有固定收入嘅人，會用銀碼詳列自己唔同方面嘅開支，但咁樣對於每個月收入唔穩定嘅人就有一定難度。唔想下下用銀碼去綁住自己，不如改用比例，例如曾經喺日本三井銀行工作嘅理財規劃師菅井敏之，就提出用六四黃金比例去理財。

菅井嘅六四黃金比例理財法：
A. 60%每月固定要預留嘅錢：
(i) 15~20%：定額存款
(ii) 25~30%：房貸／房租
(iii) 5~7%：保險
(iv) 3~5%：雜費
B. 40%每月的生活費與臨時開支

菅井這套方法是在銀行觀察到有錢客戶的理財方法後，歸納出來的，而他自己亦把這方法應用到生活上，結果48歲便可退休，還有6棟物業，靠租金由入做到財務自由。

3. 開幾個戶口處理不同收支

你可以開多幾個戶口，又或者用幾張信用卡，但重點係每一個戶口，一定要獨立處理唔同開支。例如戶口A係用嚟畀水電煤同雜費嘅，你每個月就放剛剛好嘅金額入去等佢自動轉帳，另一個就處理你自己同家人嘅保險費，仲有日常食飯搭車開支嘅戶口。

最緊要係，專門畀自己買奢侈品嘅獨立戶口、或者卡，你每個月頭就應該分配好呢個戶口或者呢張卡，今個月可以有幾多「信貸額」。

4. 固定每個月提款嘅次數同時間

有固定嘅提款次數同時間，就代表你需要規劃好每次提款期內可以洗幾多錢，千祈唔好等一無錢就撳。除非你嗰段時間有意料之外嘅開支或者抵抗唔住消費嘅意慾，否則應不會出現因為無錢而撳錢呢個情況。呢個情況愈頻繁地出現，就代表你嘅理財方法愈需要改進。

5. 唔好過於壓抑自己唔去消費

雖然話要儲錢，但呢個年代講生活講享受，你都唔可以長期對自己太苛刻，否則只會不知不覺積落好多壓力，尤如計時炸彈，到時分分鐘要預一筆額外開支來睇醫生。適當嘅奬勵會令自己更加有動力去達成你嘅目標，儲錢都係想自己第日過得開心啲姐，係咪？

#image5@!

6. 學習投資

香港地，除非你收入好高，否則淨係儲錢就唔好奢求會改善到生活。小編唔係想叫大家去學丁蟹方展博咁幾廿億上落，但係都不妨學習吓有啲咩穩健嘅投資理財方法，例如買下收息股、債券基金等，利用錢搵錢達致財務自由。想知點樣可以錢搵錢，詳情可以買本我哋每星期出版嘅《經濟一週》刨一刨！亦歡迎各位讀者向我哋發問！

伸延閱讀：
【想儲首期上車 每月要儲幾多?】
http://www.edigest.hk/Vip/detail?id=5843
【月入1.8萬畀350元家用 激起民憤】
http://www.edigest.hk/Vip/detail?id=5063
【學識階梯存錢法 一年儲多十萬蚊！】
http://www.edigest.hk/Vip/detail?id=4701