有一類人 永遠都無法買到筍盤

筆者：「你準備好未架？」
朋友：「準備好啦，首期、貸款額都無問題。」
筆者：「咁你有咩心水？」
朋友：「唔…好似你咁，開始嘅時候買間平平哋試吓先。」

與朋友認識多年，很想幫他上車，於是約實他於某週末，到兩個心水地區睇樓，一方面睇近期心水筍盤，另一方面介紹相熟代理給他，首先睇舊區的二手樓，有一、兩個盤筍到自己都想買。

筆者：「呢個盤堅筍，300頭呢啲銀碼真係難得。」
朋友：「好似好細咁，租到幾多錢？」
筆者：「則靚，兩房，位置靚，近地鐵，應該租到12,000元。」
朋友：「回報幾好，但好似好殘咁！」

筆者：「有幾殘？少少汚糟，幾萬蚊翻新吓就租得。」
朋友：「真係值得買？」
筆者：「如果有額我都想買。」
朋友：「唔…諗諗先~~」
筆者：「仲諗？快啲傾啦！呢啲筍盤過兩日實冇！」
朋友：「都係睇吓啲新樓比較吓先…」

於是筆者又相約朋友於另一天，睇新盤示範單位，近期新盤多，因應他的預算，揀了兩個我覺得性價比最高的給他。

筆者：「呢個盤係近期我覺得值搏率最高嘅新盤。」
朋友：「真係幾靚，會所又大又豪，係價錢貴咗啲。」
筆者：「响你預算之內。」
朋友：「係啫，但係呎價成萬七、八蚊，貴好多喎。」
筆者：「新樓、會所靚、位置靚，梗係貴啲架啦。」

朋友：「真係值得買？」
筆者：「如果要買一間新樓，我一定揀呢個盤。」
朋友：「唔…諗諗先~~」
筆者：「仲諗？遲啲冇晒細單位，買唔到架啦！」
朋友：「睇落又好似二手樓抵買啲…」

想了又想，那二手筍盤賣了，那新盤細單位也賣光了。

世上難有完美單位

其實朋友根本還沒有準備好，睇二手樓又覺得舊，睇新樓又覺得貴，睇又新又唔貴的，又覺得偏遠。試問那有單位是完美的？就算有這樣的絕世筍盤，也不可能落到一位新手的手上吧，代理自己收到盤都已經買了！

所有單位都有它的不完美，很多未買過樓的朋友，都會將主觀感覺無限放大，左諗右諗，一次又一次錯過機會。

筆者非常了解，在這種狀況下，朋友不可能買到筍盤。正如上述情況，就算真的遇上筍盤，朋友都不知道筍，又會左諗右諗，諗乜？唔知！總之就係要諗吓，試問筍盤又怎會躺在這裡等你去左諗右諗？

解決有兩個方法，一是先睇一百幾十間，每區都睇，甚麼類型的樓都睇，睇得多才會比較，有目標才知道如何出擊。二是找一個信得過的投資者朋友，他建議你買甚麼，你就買甚麼。不然，最終只會買唔到樓，又或者千揀萬揀，揀着個爛燈盞。