俄美女6大因素最愛中國男

撰文：JOEY

話明美女如雲係咪就等於俄女一定高要求呢？恰恰相反！原來俄國人口喺過去幾十年一直處於負增長狀態（簡單而言，係死亡率高過出生率），久而久之演變成男女近四六比嘅情況，令俄羅斯嚴重唔夠男人。有嘅俄女仲直言，喺俄國嘅男人不愁無女人，女追男嘅情況相當普遍，但女追男就唔再隔重紗，直頭係隔咗成個俄國咁難！同埋呢個環境令到俄仔超級「揀擇」，有啲仲嫌金髮長腿成街都有，話無厘特別而華麗轉身去搵東方囡囡添！啲俄羅斯美女苦等俄仔如同家常便飯，真係令一眾港男相當羨慕呀！

不過正正因為唔憂無囡囡，俄國嘅男人受盡萬千寵愛就變得嬌生慣養，喺某啲俄女心目中，俄國男人嘅缺點多籮籮，又懶又無責任感，唔識煮飯又唔肯做家務，酗酒又臭脾氣，仲好暴力成日打女人。所以依家普遍俄女嘅人生目標清單入面都有一項，就係「嫁出國外」！唔係講笑架，之前係俄羅斯有本書大賣全國，書名正正就係《如何嫁給外國人》。

俄女愛嫁中國男。

日女就想要個月薪二萬五嘅丈夫，咁俄女又有咩擇偶條件先？答案都令人幾驚喜架！根據非正式嘅統計，原來俄羅斯女人心目中嘅理想丈夫係中國男人！係佢地眼中，中國男人嘅形象同俄仔又係個恰恰相反，話中國男做嘢勤力、又會主動幫手打理家頭細務、唔會酗酒而且溫柔好脾氣、家庭觀念重仲道德水平高… 所以俄仔幾識玩浪漫都好，考慮到將來嘅俄女都係對俄仔敬而遠之，覺得走得快好世界。

講開又講，俄羅斯嘅美女唔係得個樣貌身材殺食架，因為俄國太多女人而啲俄仔又俾人寵壞哂，所以俄女好多時都需要自力更生，被社會環境訓練得相當獨立之餘仲好識得照顧人。有個俄籍太太嘅網民就分享佢哋嘅生活點滴話，佢嘅太太每日會為佢準備一切用到嘅嘢，上至手錶下至內褲都會幫佢襯好哂等佢唔洗諗，甚至可以一手包辦全屋嘅裝修，做俄女背後嘅男人只需要準備好個荷包就可以安枕無憂喇！

講咗咁多，你又想唔想娶個俄妹返屋企？

你可能有興趣的文章：
【月入25,000元 有資格娶日本老婆返屋企】
http://www.edigest.hk/Vip/detail?id=3409
【財金靚女 輪界最多】
http://www.edigest.hk/Vip/detail?id=2962