印花有價有市 扲完咪亂丟

但其實印花放上網大把人要，除了在傳統的網上拍賣區可以搵到，連facebook都開設了印花交換群組。呢枚小小的印花，真係唔可以睇少？

至於邊啲印花值錢，就要睇派發的商店以往換過咩贈品，啲贈品搶唔搶手有關，就好似買股票咁，要睇往績，唔係隨便投資架。

7-11印花

7-11的印花可算係印花屆中的藍籌，皆因贈品好高質，經常與不同卡通公司合作，每期有新鮮感之餘，贈品亦有價有市。

今期同有「廚具界LV」Le Creuset合作，推出花花煲造型餐具兼保護蓋。買滿80元，換到7個印花再加22元，共102元。一套10款係1020元，加埋Le Creuset木廚櫃238元，全套1258元。

上星期三(4月6日)開始換，一推出個廳櫃已經換完。雖然7-11話可以補購，但最快要6月中先可以取貨，好多人唔等得，所以依家一SET廚具，係網上最高已經炒到2,000元。

佢啲印花都好值錢，係YAHOO拍賣上面睇到，有人放96個印花，起標價80元，至今日下午3時已經叫價到380元，平均每個印花差不多4元，都咪話唔好賺。

睇返往績，之前曾換過「Sanrio Characters 扮動物毛公仔」、「怪獸公司公仔」、「Paul Frank百變公仔」同「海賊王模型」等，全部都係熱門卡通。集齊一套加埋特別版，個價分分鐘炒得高過 iPhone。

好似「怪獸公司公仔」咁，當時一套12款連隱藏版毛毛公仔，旺角信和商場格仔舖曾標價高達880元。而Yahoo拍賣中而家賣緊「Sanrio Characters 顏色筆」一套12款+特別版公仔+套裝陳列架，總值880元。

惠康印花

超級市場係最易儲印花的地方，皆因柴米油鹽零食汽水乜都有，閒閒地可以買幾日蚊野。

而惠康就經常舉行儲印花活動，買滿60元一個，星期六、日買滿350元仲有得雙倍印花，唔算難儲。

不過惠康既贈品通常都係適合主婦，例如Ellehammer行李箱、Sambonet不銹鋼刀具、多啦A夢戶外用品等，論贈品吸引度唔及7-11。所以有人經常將惠康印花放上網賣，網上售價大約0.5元一個，如果贈品熱門，好似早前的多啦A夢贈品，售價高達3元。今期換緊MasterChef煮食廚具，大家又有冇興趣炒？

萬寧印花

萬寧印花贈品都好多唔同種類，好似STAUB鑄鐵鍋具、德國孖人牌刀具及廚剪等，都係實用為主，亦係大牌子。

萬寧印花通常是買滿60元換到1個，儲夠35個起可加錢換禮品。曾經換過STAUB 24cm紅色圓形燉鍋既參考價為3,599元，當時儲滿35個印花再加899元就換到，相等如25折。

如果唔換禮品，將印花放上網賣亦大把人要。今期換緊的Delsey行李箱、Casa-V床上用品，在YAHOO拍賣就有人以1元個放售，有逾700個回應，都咪話唔搶手。

OK印花

OK印花贈品都唔差，「醜比頭幸運小盆栽」、「熊本熊幸運御守」同「鬆弛熊水杯」等，雖然款式冇咁多，但勝在有時仲有Jumbo獎！而贈品通常都幾實用，好似盆栽、原子筆、水杯等，唔係只係用黎擺，性價比高啲。

OK印花贈品冇炒到個價咁高，可能係贈品比較實用，換左自己用都得，唔似公仔咁擺係到霸位。

係Yahoo拍賣中，有單隻「熊本熊模型」賣，由20元至80元不等。印花通常買滿30元1個，60元兩個，如此類推。而網上有賣印花約4元一個，值唔值就見仁見智啦。近期未有印花換領計劃，下次可以留意值唔值得炒！

吉野家印花

吉野家就厲害，皆因印花贈品通常好快換哂，而且非常高質又係特別版。足球小將、高達、Hello Kitty等等，卡通迷都讚口不絕，而且款式多而實用，好似行李名牌、毛巾、保暖杯、連化妝袋都有。叫埋男女朋友去食都多個藉口，冇就唯有一個人毒食……

吉野家印花通常買滿30元有1個印花，60元兩個，儲夠4至8個起可加錢換禮品。由於換購印花數量少，加上贈品通常先到先得，好快換哂，所以網上冇乜吉野家印花放售。

溫馨提示：

1. 唔好過期，唔好過期，唔好過期。重要的事說三次。小編的朋友有過不堪回首既慘痛經歷：一次儲左大半張（保守估計有40個！），但過咗期，玩完。

2. 有時鋪頭冇哂贈品，會俾張收據你，叫你之後拎返。記得唔好當普通收據丟咗佢，小編的朋友又係試過，冇睇清楚丟咗，Game Over。

3. 記得拎張印花收集卡，小編的朋友試過儲滿哂開開心心去換，點知個職員話冇張印花卡唔俾換，正宗見財化水。

4. 網上有唔少買賣或交換印花活動，要小心核實真假。

5. 如果儲咗唔少印花又唔夠換，可以考慮上網賣左佢，亦可以買印花湊夠數。總好過掉哂佢咁浪費！當然，送俾人又得！