做地盤四年搵過百萬 真正贏在起跑線

當你捱過TSA順利年滿十八歲時，一般凡人諗都唔諗繼續讀上去，打算點都拎返個學位。

Stop It!(圖片來源﹕網上圖片)

呢個思維Out啦，想嬴在起跑線上，首先你要退學。冇錯，係叫你退學。即使你係打工仔，你都應該即刻轉行，除非你係CEO。

根據建造業議會嘅「BUILD 升」培訓計劃資料顯示，只要你年滿十八歲就有大把課程畀你揀，連最受歡迎嘅紮鐵都有，面試成功就可以即刻訓練，訓練期間每日有150元津貼。完成訓練，通過考試就可以成為中工。之後仲會介紹埋你返工，通過公司面試就可以返工啦!

可能你會擔心，面試即係有機會唔得。放心，小編已經幫你問埋，職員話入學面試好簡單，主要睇你識唔識中文同有冇色盲，仲容易過依家啲細路入幼稚園；至於公司面試方面，你放心喇，依家建造業咁等人用，只要你有手有腳，一定請你!

訓練地點仲有咁多，真係服務周到。(圖片來源﹕建造業議會)

假設你18歲之後選擇身體力行建設香港，只要完成「鋼筋屈紮班」為期97日嘅訓練，過埋考試就即刻可以成為紮鐵中工，幫香港出一分力。而且係有汗出有糧出，每日900元，以一星期工作五天計，每月四週，月薪18,000元，即係年薪起碼有20萬元，人工已經跑贏唔少剛畢業的大學生。

做三年中工就可以考大工牌，叫得大工當然專業好多，個試都好似難咗。唔再考你基本中文，而係行內知識同實際紮鐵技巧。不過小編相信，如果你三年內努力學習，一定難你唔到!拎到大工牌，就有2,000元一日，人工即時三級跳，月薪40,000元，年薪480,000元。

如果你堅持追逐無涯嘅學海，知識是要錢的。假設你成績好入到政府資助嘅大學，每年學費42,100元，讀四年就要168,400元，未賺錢先負債。

即使你幸運地一畢業就有工，如果你成績一般又唔係讀咩特別專科，最多都係搵10,000元月薪左右，一年只係12萬元。即係話，畢業之後你唔係零，你係負。

但望望建造業嘅朋友，頭四年已經可以搵到差不多113萬元收入。如果夠生性，呢段時間死慳死抵，每個月只用3,000元基本洗費的話(當然住就痴屋企啦)，基本上都儲到接近100萬元，夠畀首期買個細細地的上車盤，仲唔係真正贏在起跑線？

如果你想留紮鐵呢類賺大錢機會畀其他人，你仲可以選擇搭棚(中工每日750至1,000元，大工每日900元至1,200元)、油漆工(中工每日500元，大工﹕每日850至1,150元)、泥水工(中工每日500元，大工每日850至1,150元)，雖然冇紮鐵咁高，但點都有睇頭過好多大學生文職工。

相關文章：
【世界變 地盤保安變筍工】 http://www.edigest.hk/Vip/detail?id=1405